Savalimmiut Danmarkilu kalerrisaarummik radariliinissaq pillugu isumaqatigiissummik atsioqatigiittut
Savalimmiut Danmarkilu Savalimmiuni NATO-p radarianik atuilernissaq pillugu sisamanngornermi isumaqatigiissuteqarput.
Jenis av Rana, nunanut allanut naalakkersuisoq aamma illersornissamut ministeri Morten Bødskov Tórshavnimi naalakkersuisut allaffissuanni isumaqatigiissummik atsioqatigiissimapput.
Atlantikup avannaani sakkutooqarnikkut suliaqartoqarnerulernissaa naatsorsuutigigatsigu tamanna pingaaruteqarpoq, illersornissamut ministeri Morten Bødskov oqarpoq.
Radari qaqqamut Sornfellimut inissinneqassaaq. Radari timmisartut angallannerannik nakkutilliissaaq 400 kilometerillu angullugit nakkutilliisinnaalluni. Radari kalerrisaarutaasoq NATO-p Islandip Tuluillu Nunaata akornanni radariutaasa angusinnaanngisaannik matussusiissaaq.
- Piffissami aggersumi russit makitanerulernissaat takusinnaavarput. Taamaammat pingaaruteqarpoq, sumiiffinni nakkutilliiffigisatsinni angusinnaanngisatta naalagaaffeqatigiinnit isumagineqarnissaat. Radarimut matumunnga aningaasaliissuteqarnitsigut tamanna maanna isumagilerparput. Isumaqatigiissuteqarsinnaanerput nuannaarutigilluinnarparput, Morten Bødskov oqarpoq.
„Issittumi Piginnaasanik annertusaanissami“ radarimut 2021-miit 390 millioner koruunit immikkoortinneqarsimapput. Radariliineq Savalimmiuni Naalakkersuisut Illersornissamullu ministeeriaqarfiup ataatsimeeqatigiittarneranni oqaluuserineqartassaaq, Morten Bødskov ilisimatitsivoq.
Partiit illuatungiliuttut amerlanerussuteqartitsisut
Isumaqatigiissut suleqatigiinnissamik isumaqatigiissutaavoq, nunanullu allanut naalakkersuisup radariliinissamut tapersersortissarsiornermut ukioq ataaseq sinnerlugu atorsimavaa.
Isumaqatigiissummillu atsioqatigiinnissamut aqaguttoq unnukkut aatsaat taperserneqarluni.
Lagtingimi nunanut allanut ataatsimiititalipa apeqqut suliarisimavaa, ataatsimiititaliamilu isumaqatigiissummut ilanngunnissaq tamanit isumaqatigineqarani.
Partiimi naalakkersuisooqataasumi Folkeflokkenimi ilaasortat inassutigisimavaat, naalakkersuisup atsioqataanissani utaqqisissagaa, isumaqaramik Savalimmiut isumaqatigiissummit pissarsiassaqarpallaanngitsut. Partiimit kissaatigineqarsimavoq, radarimut akuersaassagaanni EU-mik niueqatigiinnissamik pitsaanerusumik isumaqatigiissuteqartoqassasoq.
Partiimilli illuatungiliuttumit Javnaðarflokkurinimit (Socialdemokraatit) isumaqatigiissuteqarniarneq taperserneqarpoq, taamaalillunilu isumaqatigiissusiornissamut amerlanerussuteqartoqalerluni.
- Partiimi politikkitta salliutineqarnissaa piumasarisinnaagaluarparput, matumanili isumannaatsuunissarput aamma iligisatta isumannaatsuunissaat pineqarput, naalakkersuisuni siulittaasuusimasoq aamma Javnaðarflokkurinimi siulittaasuusoq Aksel V. Johannesen nassueruteqarpoq.
Savalimmiut radarimit paasissutissanik pissarsisassasoq
Isumaqatigiissummi allassimavoq, Savalimmiuni suliffeqarfiit radariliornermut atatillugu suliassanik neqerooruteqarsinnaasut.
Tamatuma saniatigut Vágar Lufthavn aamma Vørn (aalisarnermik nakkutilliisoqarfik) radarimit paasissutissanik pissarsisassapput.
Savalimmiuni oqartussat aamma atortorissaarutinik, radarimit paasissutissanik tigooqqaasinnaasunik pissarisinnaapput, Savalimmiormiullu radarimit paasissutissanik suliaqartarnissamut aamma ilinniartinneqassallutik.
Naalakkersuisulli siulittaasuannut alla pingaaruteqarnerpaavoq.
- Tamatuma toqqissisimanerulersissavaatigut, Jenis av Rana oqarpoq.