Savalimmiunut tikinnermi coronamut misissortinnissamut inatsisitigut piumasaqaat atorunnarsinneqartoq

Savalimmiuni coronamut killersuuterpassuit inassuteqaatinik tunngaveqarput. Siornali juunip qaammataani aallartittumik Savalimmiunut tikittut tamarmik covid-19-imut misissortittarnissaat inatsisigut piumasaqaataasimavoq.

Naalakkersuisulli tuniluuttoqarnerata aqunneqarsinnaalersimanera pissutigalugu maanna aalajangersimavaat, piumasaqaat septembarip aallaqqaataaniit atorunnaarsinneqassasoq.

- Inuiaqatigiinni annerusumik minnerusumilluunniit nalinginnaasumik atugaqalersimavugut, killeqarfimmilu pissutsit aamma maanna nalinginnaanerulersimallutik. Savalimmiuni ajunngitsumik ingerlasimavugut. Inuit akisussaaffimmik tigusisimapput, maannalu neriuutigaara, inuit inassuteqaatinik nutaanik tigusilluarlutillu ataqqinnissasut, lagmandi Bárður á Steig Nielsen oqarpoq.

Marlorialuni misissortittarnissaq inassutigineqartoq

Piumasaqaatit atorunnaarsinneqaraluartut oqartussanit neriuutigineqarpoq, angalasut suli misissortittassasut. Inassuteqaatit nutaat naapertorlugit, Savalimmiunukarnissaq ullunik marlunnik sioqqullugu misissortittoqartassaaq tikereernermilu ullut marluk qaangiunnerani misissorteqqittoqartassalluni.

Tamatuma saniatigut coronamut misissortissimanermit akissutisinissap tungaanut mianersortoqartassaaq.

Coronap tuniluunnerata nalaani tikinnermi mattusimanissamut inassuteqaatit assigiinngittarsimapput. Aallaqqaammut ulluni 14-ini mattusimasoqartarnissaa inassutaasimavoq. Tikinnermi coronamut misissortittarnissaq atuutsinneqalermat, ulluni arfinilinni mattusimasarnissaq inassuteqaataasimalluni. Kingusinnerusukkut ulluni sisamani mattusimasarnissaq inassuteqaataalerpoq, maannalu mattusimasarnissamut inassuteqaatit atorunnaarsinneqartussanngorlutik.

Juuli qiteqquttoq kingullermik tuniluuttoqangaatsiarsimasoq

Aggustip 26-ani Savalimmiuni inuit arfinillit coronamik tunillatseqqasuusimapput.

Coronap nunarsuarmi tuniluunnera 2020-mi martsip qaammataani Savalimmiunut anngummalli, Savalimmiuni tuniluuttoqangaatsiartarsimavoq.

Kingullermik juulip aallartinnerani tuniluuttoqangaatsiarpoq, juulip 13-ani amerlanerpaallutik sapaatip akunnerani tunillatsissimasut nutaat 98-iusimallutik. Tassunga atatillugu lagmandi naalakkersuisullu isornartorsiorneqangaatsiarsimapput, juulip qiteqqunnerani aamma juulip 28-ani 29-anilu inuiattut ullorsiornerni, ólavsøka, dronningip tikeraarnissaa akuerisimagamikku.

Peqatigitillugu festivalertitsinissat taamaatinneqarnissaat sakkortuumik piumasaqaataasimavoq, naggaterpiaanilu festivalinut ikiorsiissuteqarnissaq naalakkersuisut neqeroorutigisimallukku.

Inuiattut ullorsiornermi nalinginnaasumik ingerlatsisoqarnerani tuniluuttoqaqqilissanersoq pissanngatigineqarsimavoq.

Akiuussutissalersuisoqarsimammat annikinnerusumik nakkutilliisoqartoq

- Isumaqarpugut, maannakkorpiaq akiuussutissalertissimasut amerlammata tuniluuttoqarpallaanngimmallu, tikinnermi misissortittarnissamik piumasaqaatip unitsinneqarnera siunertaqarluartoq, nappaalanersuaqarneranut ataatsimiititaliami siulittaasoq Michael Boolsen Kringvarp Føroyamut oqarpoq.

Savalimmiuni innuttaasut 68.4 procentii ataasiarlutik akiuussutissamik kapineqarsimapput, 63,5 procentiilu tamakkiisumik akiuussutissalerneqarsimallutik. Meeqqat aqqaneq-marlunnik ukioqalerersimasut Danmarkimisulli akiuussutissalerneqassapput.

Savalimmiuni inuit 999-it tuniluuttoqalermalli tunillatsissimapput, marluk nappaat toqussutigisimavaat. Ullumikkut innuttaasut 100.000-iugaangata 7,7-it tunillatsittarput.

Tassa assersuutigalugu ullut arfineq-marluk kingulliit ingerlaneranni inuit sisamat tunillatsissimasarput. Kalaallit Nunaanni 50-iusartut, Danmarkimi 120-usarlutik.