Savalimmiunit folketingimut ilasortat pisoqareersorlu: Oqaluttarfimmi danskisut oqaluttarpugut

Kalaallit Folketingimut ilaasortat kissaataasa akerliannik savalimmiormiut oqaluttarfimmit ilitsoqqussaralugu oqaatsiminnik oqalukkusunngillat.

Danskit Folketingianni danskisut oqaluttoqartarpoq.

Oqaluttarfimmit kalaallisut oqaluttoqarsinnaanera pillugu oqallisaalernerata kingorna, Savalimmiunit folketingimut taama oqarput.

Anna Falkenberg savalimmiormiut partiiat Sambandsflokkurin tunuliaqutigalugu qinigaavoq.

- Danskit Folketingianniippugut. Danskisut immitsinnut paasisinnaagatta danskisut oqaluppugut. Oqaatsit taakku atorlugit oqaloqatigiissinnaavugut, taanna oqarpoq.

Kalaaleq folketingimut ilaasortaq Aki-Matilda Høegh-Dam (Siumut) naalagaaffeqatigiinneq pillugu oqallittoqarnerani kalaallisut oqaluttarfimmit oqalunniarluni aalajangerpoq.

Folketingimillu ilaasortat allat apeqquteqaraangata aamma kalaallisut akisarpoq.

Najuuttut qanoq oqaaseqarnera paasisinnaanngilaat.

Ilaatigut SF-meersoq Karsten Hønge naammatsippoq.

- Kalaallit tusagassiorfiini atorneqarnissaa pissutigiinnarlugu pisumi isiginnaartuunianngilanga, Karsten Hønge oqarpoq.

Tallimanngornermi oqallittoqarnerata kingorna, kalaallit tamarmik qallunaatut paasinnittannginnerannik naqissusiiniarluni, Aki-Mathilda Høegh-Dam oqaluttuarpoq.

- Oqaluttarfimmi suli qallunaatut taamaallaat oqaluttarnerput nunasiaataanermit amiakkuuvoq. Danmark piviusumik naalagaaffeqatigiiugaluarpat, oqaatsivut aamma inissaqartinneqassagaluarput, taanna oqarpoq.

Oqaluttarfimmi savalimmiormiutut oqalunnissaq pisariaqanngitsoq, Anna Falkenberg isumaqarpoq.

- Soorunami ilaasa savalimmiormiusut oqalunnissarput orniginartinnerussagaluarpaat, kisianni savalimmiormiut tamarmik danskisut paasisarput. Taava kikkut tamarmik paasinnissinnaanissaat siunertaappat, taava Savalimmiormiusut oqalunnissamut pisariaqartitsineq annertunngilaq, Anna Falkenberg oqarpoq.

Sjúrður Skaale Javnaðarflokkurin tunuliaqutigalugu qinikkap isumaqatigaa.

- Savalimmiormiusut oqalunnissara ajorissanngikkaluarpara. Kisianni Savalimmiuni inatsisartuni savalimmiormiusut oqaluttarpugut, Folketingilu Danmarkip inatsisartuisut isigaara – naalagaaffeqatigiit inatsisartui pineqaratik.

- Taamaammat danskisut oqaluppunga. Tassa taamaappoq, Sjúrður Skaale oqarpoq.

Aaja Chemnitz (Inuit Ataqatigiit) kalaallini folketingimut ilaasortap aapparaa. Oqaluttarfimmit kalaallisut oqalussinnaanissamut periarfissaq tapersersorpaa.

- Kisianni atorsinnaasumik aaqqiissuteqartoqartariaqarpoq. Qanoq ingerlanneqarnera isumaqatigivallaanngilara, tassami oqallinneq unittoorpoq, tamannalu uggornarpoq. Kisianni siunertaa isumaqatigaara, taanna oqarpoq.

Aaja Chemnitzip kalaallit Danmarkimut tikittartut qallunaatut oqalussinnaanngitsut amerliartuinnartut allannguiffigissallugit eqqarsaatigineruai.

- Kalaallit Danmarkimi innuttaasut amerlasuut oqalutseqarnissamik neqeroorfigineqarneq ajorput, naak inatsimmi pisinnaatitaaffigigaat allassimagaluartoq. Isumaqarpunga ajornartorsiut taanna annertunerusoq.

Kalaallit peqqinnissaqarfimmut inunnullu isumaginnittoqarfimmut saaffiginnittut pisinnaatitaaffigisaminnit ikiorneqartannginnerat, taassuma oqaatigaa. Pingaartumik meeqqanik inissiisarnermut suliani.

- Taamaammat uagut atukkatsinnit sammisaq kivikkusunneruara, tassami atorfik nammineq toqqarparput – taassumalu piumasaqaatai. Innuttaasut soqutigisaat suliariniarlugit maaniippugut, taanna oqarpoq.

Folketingimi oqaluttarfimmi oqaatsit suut atorlugit oqaluttoqartarnissaanik inatsisini allassimasoqanngilaq.

Folketingimi siulittaasoqarfiup oqaluttarfimmi kalaallisut oqalunnissamut inatsisit oqallisigissavaat, aammalu oqalutseqartoqarnissaanut periarfissaqassanersoq misissussallugu.

Powered by Labrador CMS