naalagaaffeqatigiinneq

Savalimmiunik suleqateqarneq nukittorneqarnissaa neriuutigineqartoq

Savalimmiut Kalaallit Nunaallu nutaamik suleqatigiinnissamut isumaqatigiissuteqarput

Kalaallit Nunaat assigalugu Savalimmiut aamma erngup nukinganik nukissiorneq aallutaraat, tamannalu aamma suleqatigiinnissamut isumaqatigiissummi ilaavoq

Inuussutissarsiuteqartut, kattuffiit, peqatigiiffiit inuillu ataasiakkaat suliniutinik aalajangersimasunik suleqatigiikkusussuseqartilernerisigut, Naalakkersuisut neriuutigaat Savalimmiut Kalaallit Nunaallu suleqatigiinneq nukittortinneqassasoq.

Isumaqatigiissut nutaaq
Kajumissaarineq suleqatigiinnissamut isumaqatigiissummi Savalimmiuni lagmandimit Aksel V. Johannesenimit Naalakkersuisullu siulittaasuannit Kim Kielsenimit, lagmandip Naalagaaffeqatigiit ataatsimiinnissaat sioqqullugu tikeraarnerani, atsiorneqartumi ilaatigut imarineqarpoq.

- Aamma avatangiisit nukissiornerlu pillugit suleqatigiinnerup siunissami qaninnerusumi ukkatarineqarnissaa isumaqatigiissutigigatsigu. Suliassaqarfinni taakkunani nunani pineqartuni ineriartorneq annertusimaqaaq, suleqatigiinnerulernitsigullu qanoq iliornikkut suli siuariartortoqarsinnaanera misissussallutigu, Kim Kielsen tusagassiuutinut nalunaarummi oqarpoq.

Naalagaaffeqatigiit ataatsimiinnerat
Aksel V. Johannesen Kalaallit Nunaannut tikeraarpoq Danmarkimi, Savalimmiuni Kalaallit Nunaannilu nunamik aqutsisut naalagaaffeqatigiittut ukiumoortumik ataatsimiinnissaannut atatillugu, ataatsimiinnissarlu taanna Kalaallit Nunaanni pissaaq tallimanngornermi ulloq 29. apriili 2016.

Savalammiunit angalaqatigiit tassaasut lagmand nulialu saniatigullu atorfilittat pingasut, Utoqqarmiut Kangerluarsunnguannut erngup nukinganik innaallagissiorfik takusarpaat Savalimmiormiullu Nuup kujataani aalisakkeriffigisimasaat Nordafar Færingehavnilu aamma alakkarterlugit.

Atuaruk: Savalimmiut Nunatsinni talittarfitoqqami torersaassiniarput

Powered by Labrador CMS