Savalimmiuni toqutsinermik suliaq: Toqungasup timaa qaqinneqarpoq
Niviarsiaqqap 16-inik ukiullip toqungasup timaa qaqinneqarpoq, Savalimmiuni politiit ipisimanera qulakkeeqqissaarsimanngimmassuk.
Angut 23-nik ukiulik Savalimmiuneersoq, niviarsiaraq 16-inik ukiulik novembarimi unnuakkut 2012-imi toqussimaneranik pinngitsuunerarpoq.
Taanna tunngavisumik inatsit tunngavigalugu sisamanngornermi Savalimmiuni Eqqartuussivimmi killisiorneqarnermini taama oqarpoq, tassani suliami ukiunik arfinilinnik pisoqaassuseqartumi toqutsisimasutut unnerluutigineqarpoq. Unnerluussut naapertorlugu taassuma immami ipisissimavaa.
Eqqartuussineq sumiiffimmi nalunaaqutaq malillugu 09.15 aallartippoq, 23-nik ukiulik siullermik toqutsisimasutut unnerluunneqarnera oqaatigalugu unnerluussisoq aallarniuteqarpoq. Tamatuma saniatigut peqqarniitsumik, ulorianaatilimmillu nakuusersimasutut unnerluunneqarpoq, taamaalilluni niviarsiaraq piumassuserinngisaminik ipitinneqarluni.
Tassa eqqartuussivik toqutsinermut tunngavissaqartitsinngippat, unnerluussisussatitaasut nakuusernermut peqqarniitsumut tigummigallarneqartussanngornissaa anguniarpaat.
Arlaleriarluni suliareqqinneqartoq
Suliaq ukiunik arfineq-marlungajannik pisoqaassuseqartoq, Savalimmiuni arlaleriarluni misissoqqinneqarluni qaqinneqartarpoq.
Novembarimi 2012-imi niviarsiaraq immami ipisimasoq nunaqarfimmi avannarpasissumi Hvannasundimi najugaqarfimmini nassaarineqarpoq. Siullermik toqunerani pasinartoqartitsisoqanngilaq, suliarlu naammassineqarpoq.
Angutip maanna toqutsisimasutut unnerluunneqartup niviarsiaraq ipisimasoq nanineqarmat aapparisimavaa.
Niviarsiaraq misissorneqaqqinnissamut qaqinneqarnissaat politiit kingorna aalajangerput, kisianni aamma tassani ipinerani pissutsinik pasinartunik takussutissaqanngilaq.
Politiit siorna aggustimi tamanut saaffiginnillutik, suliamut tunngatillugu inunnik takunnissimasinnaasuni tusagaqarsimasinnaasunilluunniit saaffiginneqqusillutik attaveqarput.
23-nik ukiulik pingasunngornermi ilaatigut arlaleriarluni illumik misissueqqissaareernerup kingorna tigusarineqarpoq.
Torshavnimi tunngaviusumik inatsit tunngavigalugu sisamanngornermi killisiuinermi, unnerluussisup killisiuinerup matoqqasuunissaanik piumasaqarnera eqqartuussisup taperserpaa.
Unnerluussisoq assigalugu inuit tusarnaaqataanerisa misissuinermik sulineq akornusersorsinnaagaa eqqartuussisoq isumaqarami, ilisimannittut arlallit apersorneqarnissaa suli amigaataammat.
Suliami allami eqqartuunneqarsimasoq
Angut 23-nik ukiulik taassuma niviarsiaq toqunerata kinguningaatsiaani suliami allami pineqaatissinneqarpoq. Tassani toqutseriartutut aamma nakuusertutut ukiuni arlalinni pineqaatissinneqaqqikkuni paarnaarussassanngortinneqarluni.
Savalimmiuni toqutsisoqartarnera qaqutigoorluinnarpoq. Inuiaqatigiinni toqqissisimasuni 51.000-nik innuttaasoqartumi ukiut 48-t kingulliit ingerlanerini quleriarluni toqutsisoqarsimavoq.