Skip to main content

Savalimmiuni timip kingornussaanik nalunaarsuineq isornartorsiorneqartoq

Ukiut qulit ingerlaneranni savalimmiormiut timikkut kingornussaat nalunaarsorneqarsimassapput. Suliniut isornartorsiorneqarpoq, Kristeligt Dagblad allappoq

Savalimmiuni ilisimatusarnikkut suliniummi FarGen-imi pilersaarutigineqarpoq ukiut qulit ingerlaneranni qeqertani taakkunani innuttaasut 49.000-t missarpiaanniittut tamarmik timikkut kingornussaat nalunaarsorneqarsimassasut, taamaasillunilu nunarsuarmi nunani siullersaassalluni innuttaasut kingornussaannik tamanik nalunaarsuiffiusoq.
Suliniut pisortanit tapiiffigineqarpoq, paasissutissallu nunap genetisk biobank-ianut katersorneqassapput, ilisimatusarnermut, pinaveersaartitsinermut katsorsaanermullu atorneqartussatut. Ilanngullugu siunertaavoq Savalimmiut nunani tamalaani nittarsaanneqarnissaat, naalagaaffeeqqamut tassunga suliffinnik aningaasanillu pissarsiniarluni.
Inuilli timikkut kingornussaannik nalunaarsuinikkut - genomsekventering-imik taaneqartartoq - paasineqarsinnaapput nappaatit pigineqarsinnaasut, immaqali atuutilinngisaannassasut. Tamannalu pisariaqanngitsumik annilaanganermik pilersitsisinnaavoq, isorinnittut oqarput. Taamatut allappoq Kristeligt Dagblad. Isornartorsiuisut ilagaat Det Etiske Rådimi ilaasortaq, nakorsaq Lotte Hvas. Taanna upernaaq Savalimmiuni FarGen pilugu ataatsimeersuarnermi peqataasimavoq isumaqarporlu suliniummi pitsaanngitsumik akuleriissinneqarsimasut ilisimatusarneq aammalu Savalimmiunut suliffinnik aningaasanillu pissarsiniarneq. Taanna isumaqarpoq innuttaasut "pakasarneqarsimasut".
– Tamatuma saniatigut isumaqarpunga inuup timikkut kingornussaasa tamaasa misissornissaat mianersortorujussuarmik pisariaqartoq, tunngavissalimmik pasisaqartoqaqqunagu nappaateqartoqartoq kingornuttakkanik. imaassinnaalluarpoq ilisimatuut tamakku atorsinnaagaat, inuilli ataasiakkaat atorsinnaanngilaat. Gen-itsigut kukkunerpassuaqarpugut inuunitsinni ajoqutiginngisatsinnik. Timimilu kingornussanik nalunaarsuinikkut ilisimasaqalertoqarsinnaavoq arlalinnik ileqqorissutsikkut akunnattoortitsisunik, silatunerulersitsinngitsunik, Lotte Hvas oqarpoq.
Tamatuma saniatigut Sabvalimmiuni ilisimatuussutsikkut ileqqorissaarnermut komitép FarGen isornartorsiorpaa suliniut pillugu tamanut ammasumik paasissutissiinnginneranik. Komitép aamma tikkuarpaa Savalimmiuni timip kingornuttagaanut siunnersorrteqanngitsoq, pisariaqalissappat innuttaasut timikkut kingornussaannik misissuinermi paasisanik siammarsaasinnaasumik. Taavalu Savalimmiuni inatsit putoqarpoq, taamaasilluni taamatut misissuisoqarsinnaalluni savalimmiormiut ataasiakkaat apereqqaarnagit. Suliniutip unitsinnissaanut komité pisinnaatitaaffeqanngilaq, qanittukkullu savalimmiuni peqqissutsimut ministereqarfimmut allagaqarsimavoq ajornartorsiutit tikkuarlugit, siulittaasoq, nakorsaaneq nakorsarlu psykiatri-mi immikkut ilinnarsimasoq Gunhild Isfeldt oqarpoq.
– FarGen ingerlanneqarsinnaavoq savalimmiormiut ataasiakkaat apereqqaarnagit. Taamaasioreerunillu paasisat ilisimatusarfigisinnaavaat. Taarusukkunikkulu nalunaarsukkanik ilisimatusarnertut, taava ilisimatusarnermi ileqqorissaarnermut komitémit akuersissummik peqqaartariaqanngillat. Tamanna ajornartorsiuteqartorujussuuvoq. Savalimmiormiut ataasiakkaat aperineqassapput. Allat tamarmik ileqqorissaarnikkut eqqortuunavianngillat, Gunhild Isfeldt oqarpoq.
Suliniut nunani tamalaani tupaallatsitsivoq, Savalimmiullu taaneqarput inuit timikkut kingornussaannik ilisimatusarfissatut naleqqulluartutut, tassa inuiaqatigiit immikkuupajaarmata, tassanilu ukiunut untritilinnut arlalinnut kingumut siuaasat allattorsimaffii digitalisererneqarsimallutik allaallu napparsimasut journalii elektroniskiullutik, Bogi Eiliasen, FarGen-ip pisortaa oqaluttuarpoq. Taassuma erseqqissarpaa timip kingornussaanik nalunaarsuilinnginnermi savalimmiormiut aperissamaarneqartut.
– Uagutsinnit isigalugu tamanna siunissaavoq. Timip kingornussai ulorianartuunngillat. Biologimik itinerusumik takunninniarnerinnaavoq, aaqqissuussaanerlu atorneqarsinnaavoq ilisimatusarnermut atatillugu ilisimasanik qularnaannerusunik pissarsinissamut, nappaataannaanngitsunik aammattaarli peqqissutsimi, Bogi Eliasen oqarpoq, taassumalu tikkuarpaa savalimmiormiut timip kingornussaanik misissuinerup inerneranik tunineqassanngitsut, namminneq apeqqutiginngippatigit inernerillu namminersortumit misissortinnissaat nammineq akilerlugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER