Savalimmiuni qinersineq
Savalimmiuni suiaaqatiminoortartumik siullerpaamik lagtingimut isertoqarpoq
Savalimmiuni qinersinermi Sonja Jógvansdóttir taaguunneqarluarpoq. LGBT-i aamma nittarsaalluarsimavaa
Socialdemokrati Sonja Jógvansdóttir Savalimmiuni lagtingimut iserpoq.
Sonja Jógvansdóttir politikkimi nuimasuulersussatut ilaatigut naatsorsuutigineqartartuuvoq.
Tassami inunnit 1.200-t missaannit taaguunneqareernermi kingorna lagtingimut iserpoq, partiimilu siulittaasuminit amerlanerusunit taaguunneqarluni.
- Akisussaaffimmik tunineqarpunga. Nunaqarfinnit taaguunneqarluarsimanera nuannaarutigeqaara, savalimmiuni nutaarsiassaqartitsivimmut Kringvarp Føroyamut oqarpoq.
Naligiissitaaneq
Suiaaqatiminnoortartut peqatigiiffiannit LGBT-imit aamma tapersersorluarneqarnini nuannaarutigaa.
Sonja Jógvansdóttirip naligiissitaanerulernissaq ukiorpassuarni sulissutigaa, tassani suiaaqatiminnoortartut sulissutiginerusimallugit. Apeqqummi taanna aamma qineqqusaarutigingaatsiarpaa.
Katissinnaalernissaq
Suiaaqatiminnoortartut katissinnaalernissaannut apeqqut qineqqusaarnermi oqallisigineqangaatsiarnera pissutigalugu qinigaalluarsimanera Savalimmiuni inuiaqatigiilerinermik ilisimatuup Gestur Hovgaardip naatsorsuutigaa.
- LGBT-imi ilaasortaasut naleqassutsimut sulissuteqarnerat taamaasilluni maluginiarneqarnerulerpoq. Sonja Jógvansdóttirip oqariartuutigisai tapersersorluarneqarmata qinigaalluarunarpoq, Ritzauimut oqarpoq.
Suaaqatiminnoortartut katissinnaalernissaat qineqqusaartoqarnerani oqallisigineqangaatsiartuuvoq.
Inatsisip allanngortinneqarnissaa illuatungiliuttunit sulissutigineqartoq, naalakkersuisuutitaqartut inatsimmik allannguinissamik tunuarsimaarnerusuupput.