Savalimmiuni qineqqusaarnermi takornariarpassuit sammineqartut

Sapaatip akunneri marlungajaat qaangiuppata, aggustip 31-anni, lagtingsvalgeqassaaq. Qineqqusaarneq juulip 29-anni aallartikkaluartoq, lagmandi Aksel V. Johannesen (J) qinersisitsimmat, qineqqusaarnermi Savalimmiuni inuiaqatigiit qineqqusaarutigineqarpallaanngillat.

- Qineqqusaarneq suli aallartivinngilaq. Maannamut kikkut plakatinik qineqqusaarutiminnik pitsaanerpaamik inissisimaffeqarnersut sammineqarnerupput, Ingi Samuelsen, tusagassiortoq politikkikkullu naliliisartoq, Kringvarp Færoyamut oqarpoq.

Partiit qulingiluat lagtingsvalgimut qinigassanngortipput, aatsaallu maannakkut partiit tamarmik anguniakkatik saqqummiuteqqammerpaat.

- Aatsaat maanna qineqqusaarneq aallartippoq, Ingi Samuelsen oqarpoq, partiillu tamarmik qineqqusaarutitik nalunngikkaat innersuussivoq.

Takornariaqartitsineq ineriartortoq

Tv-mi internetikkullu attaveqarfitsigut oqallisigineqartut aallaavigigaanni takornariaqartitsineq ineriartortoq sammisani maannamut pingaarnerpaat ilagaat.

Takornariat Savalimmiormiuttaaq nunami pisuttuarnissaminnut piumasaqartut nunaatilinnit aningaasanik akileeqqusisalernerat peqqutaavoq. 2018-imi Savalimmiut 110.000-inik takornariaqarpoq, ukiunilu kingullerni kisitsisit qaffariarujussimapput.

Oqallinnermi Savalimmiut takornarissallu immikkoortinneqarsinnaanersut sammineqarput, takornarissat nunami pisuttuarnissaannut akiliisillugit Savalimmiullu sungiusimasaatut akiliisinnagit.

Nuna tamakkerlugu ataatsimoorussamik aaqqiissut Visit Faroe Islandsimit ujartorneqarpoq, takornariaqartitsineq naleqquttunik tigusassaateqarnerussammat.

Inissaaleqineq

Savalimmiuni takornarissat kisimik amerliartunngillat. Innuttaasut amerliartorput, Savalimmiuni maanna inuit 51.783-it najugaqarput. Ukiut pingasuinnaat qaangiummata innuttaasut 50.000-it ataappaat 2013-imilu 48.000-iinnaallutik.

Tamanna inissianut niuerfimmut tatititsivoq. Ingi Samuelsenip naatsorsuutigaa inissaaleqineq, avatangiisit takornariaqarnerlu qineqqusaarnerup sinnerani sammisat pingaarnersarissagaat.

- Suliassaqarfiit taakku qanoq aaqqissuunneqassanersut apeqqutaavoq, Ingi Samuelsen oqarpoq.

Avissaarnissamut Danmarkimik isumaqateqarneq

Savalimmiut Danmarkillu ataqatigiinnerat qineqqusaarnerni ilaasuaannarpoq. Tamatumuunali partiit anguniagaanni sammineqarpallaanngilaq.

Juunimi folketingimut qinersisoqarmat Tjóðveldi/Republikanerne oqaasinnaaq ”Maannakkuunngippat, qaqugu” atorlugu qineqqusaarput, Danmarkimiit avissaarnissamut piffissaq eqqortuussoq ersarissumik innersuuppaat. Tjóðveldi taaneqarpallaanngilaq maannakkullu oqalunnerat Savalimmiut qaqugu avissaarnissaannut saassimavoq.

- Avissaarniarutta Savalimmiuniit partiinillu allaniit tapersersorneqartariaqarpugut, Høgni Hoydal qineqqusaarutissat saqqummiunneqarmata tusagassiortunik katersortitsinermi oqarpoq.

Anguniagaq tassaavoq siunissami ungasinnerusumi avissaarnissamut Danmarkimik isumaqateqarneq, taamanikkussamut Danmarki Savalimmiullu eqqartuussisuuneqarfiit nunallu aningaasaat suleqatigiissutigissavaat, tamarmilli nunatut namminersortutut.

Tunngaviusumik inatsit pillugu oqallittoqanngitsoq

Lagmandsparti Javnaðarflokkurin/Socialdemokraterne qineqqusaarutissamini suliassaqarfinnik tigusinissaat pillugit ataatsimoortumilluunniit tapiissutit ikilissanersut oqaaseqanngilaq. Partiit illuatungiliuttut akornanni Savalimmiut Danmarkillu ataqatigiinnerat qineqqusaarutit saqqummiunneqarneranni saamineqarpallaanngilaq.

Maannakkut naalakkersuisut tunngaviusumik inatsisiliorniaraluarsimapput, iluatsinngilarli. Tamatumuuna qineqqusaarutini eqqartorneqanngilaq.

Allamiut politiillu

Qineqqusaarnerup tulliani nunat allamiunut tunngasut suliassat tigunissaat ataatsimoortumillu tapiissutit ikilisinnissaat pilersaarutaavoq.

- Naalakkersuisooqataaniarutta namminiilivinnissamut aallussinissaq piumasaqaataavoq, Høgni Hoydal oqarpoq.

Tjóðveldip ukiut sisamat kingulliit Framsókn aamma Javnaðarflokkurin/Socialdemokraterne naalakkersuisooqatigai. Framsókn, Tjóðveldituulli, suliassaqarfiit arlallit tigorusuppai, Danmarkimiilli avissaarnissaq oqaatiginngilaa.