Lagtingimut ilaasortaq Bjarni Hammer hashimik piniarsinnaanini neqeroorutigisimangaa, savalilimmiuni aviisi Sosialurin allappoq. Lagtingimut ilaasortaq hashimik tuniniaanermut peqataasimasutut unnerluutigineqarnera, piffissami sivitsortumi tusatsiakkat  aviisipmisissuiffigai.

2017-ip ukiuata affaani Sosialurin tusarfinnit arlalinnit paasitinneqarpoq, Bjarni Hammeri hashimut atatillugu unnerluutigineqarsinnaasoq

Aviisip suliaq misissussallugu aalajangiussimavaa uppernarsarluguli Bjarni Hammerip kammalaatini aqqutigalugu hashimik pissarsisinnaalluni neqeroorutigisimangaa.

Siullermik tusarfiup sms aqqutigalugu Bjarni Hammer atteqarveqarfigaa, kingornalu pineqartoq Bjarni Hammerimut sianerluni attaveqarluni. Oqaloqatigiinnerup immiunneqarsimanera, allaaserisami allassimangilaq, kisianni aviisip tusarfik lagtingimulli ilaasortap oqaloqatigiinnerattut issuaavoq.

Politiinit killisiorneqartoq

Lagtingimut ilaasortaq hashimik suliamut atatillugu politiinit killisiorneqarsimanera, sapaatip akunnerata siuliani VP.fo allaaseraa. Nutaarsiassaqartitsivik atinik taasaqanngilaq, kingunninngualu Bjarni Hammer killisiorneqarsimanini uppernarsarlugu tusagassiuutinut nalunaaruteqarpoq.

- Killisiorneqarpunga, kisianni tigusarineqanngilanga aamma unnerluussatut pisinnaatitaaffilerneqarlunga killisiorneqanngilanga, Bjarni Hammer allappoq. 

Taassuma hashimik tunisaqarsimanngisaannarnini ilanngullugu nalunaarutigaa, pisuutitsinerillu ajortisaariniutaaneralugit. 40-liisoqarneranut atatillugu tusatsiakkat pilersimanerat tunngavissaqanngitsulli, taanna allappoq.

Sosialurinip tusarfiata oqaatigaa, Bjarni Hammer nalliuttorsiornermi pineqartoq hashimik tunisimagaa. Pineqartorli ulloq 15. december Bjarni Hammerimut hashimik peqqinniarluni attaveqarsimavoq.

Lagmandi isumakuluttoq

Bjarni Hammerimut pisuutitsinerit lagtingimi ilaasortamut nanertuusitsipput kingunerisaanilli politiitut sulinngiffeqarallarnissi aalajangiussimallugu. Bjarni Hammer Tvøroyar Kommunami aamma kommunalpolitikkeriuvoq.

Bjarni Hammer lagmandspartiimi Javnaðarflokkurin/Socialdemokratini ilaasortaavoq. Lagmand Aksel V. Johannesenip Kringvarp Føroyamut isumakuluuteqarluni oqaatigaa.

- Suliaq assut isumakulunnarivara. Javnaðarflokkurinip suliaq ilungersuumminarluinnartutut isigaa, suliarlu pillugu partiip Bjarni Hammer oqaloqatigissavaa, Aksel V. Johannesen Kringvarp Føroyamut oqarpoq.

Savalimmiuni politimester, John Kølbækip, Sosialurinip politiinut suliakkiisimanera, Kringvarp Føroyamut uppernarsarpaa. Savalimmiuni politiit attuumassuteqarpallaarmata pissutigalugu, Københavnimi naalagaaffiup unnerluussisussaatitaasuanit suliaq tiguneqarpoq.

Bjarni Hammer suliami paasissutissanut nutaanut atatillugu oqaaseqarumanngilaq.