Savalimmiuni politikkeri akiuussutissalertinnissamut qularluni nalunaartoq

Savalimmiuni nunanut allanut naalakkersuisoq Jenis av Rana, aamma nakorsaasoq, coronamut akiuussutissalertikkumanngilaq. Tamanna innuttaasunut pitsaanngitsumik nalunaaruteqarnerusoq, lagmandi Bárður á Steig Nielsen oqarpoq.

Savalimmiuni naalakkersuisoq Jenis av Rana, Miðflokkurin-imi (Centrumpartiet) siulittaasuusoq internetsikkut tusagassiorfimmut Vp.fo-mut oqarsimavoq, akiuussutissalertikkumanani piffissaq ungasinnerusoq eqqarsaatigalugu kingunerluuteqarsinnaanera annilaagangingamiuk.

Savalimmiormiut maannamut akiuussutissamik Pfizerimeersumik taamaallaat pissarsisimapput.

Naalakkersuisoq taamaalilluni Naalakkersuisut suleqatigisami inassuteqaataannut akerliuvoq. Akiuussutissaq inuiaqatigiinni tunillanneqarsinnaajunnaartoqarnissaa anguniarlugu atorneqarpoq.

- Akiuussutissat maanna atorneqartut piffissami sivisuumi allanik sunniuteqarsinnaanersut pillugit ilisimasakippallaaqaagut. Suut tamarmik qularnartuunerinut arlalitsigut assersuutit takoreerpavut, nunammi arlallit akiuussutissanik aalajangersimasunik atuijunnaareerput, Jenis av Rana Vp.fo-mut oqarpoq.

Nammineq inuttut aajangersimasoq

Jenis av Rana vp.fo-mut aamma oqarpoq, naalakkersuisut akiuussutissalertinnissamut inassuteqarsimanerat kukkusuunersoq oqaaseqarfigisinnaanagu. Jenis av Rana aamma inuit qanoq iliornissaannik siunnersuuteqarusunngilaq.

- Inuit suniarnerlutik namminneq aalajangissavaat, aajangiinerallu ataqqissavara, Jenis av Rana oqarpoq.

Jenis av Rana aatsaat siullermeerluni akiuussutissanut atatillugu qularuteqalinngilaq. Ukiualuit matuma siornatigut nakorsatut oqarsimavoq, nualluummut H1N1-imut inuit akiuussutissalerneqartariaqanngitsut, Vp.fo allappoq.

Silanngajaartoq

Illuatungiliuttut partiiannit Javnaðarflokkurin-imit naalakkersuisoq isornartorsiorneqarpoq. Partiip siulittaasuata Aksel V. Johannessenip, siusinnerusukkut lagmandiusimasup oqaatigaa, nunami avannarlermi allami taamatut pisoqarsimasuuppat pineqartut ingerlaannartumik tunuartinneqarsimassangaluartoq.

Taanna aamma isumaqarpoq, Jenis av Ranap inuiaqatigiit ammaqqinneqarnissaannik naalakkersuisut pilersaaruteqarnerat akornusersoraa

Aksel V. Johannesenip parteeqataa, folketingimi ilaasortaq Sjúrður Skaale sakkortunerusumik isornartorsiuivoq, Jenis av Ranalu silanngajaartuunerarlugu.

Pisoq naalakkersuisuni oqaluuserineqassasoq

Lagmandi Bárður á Steig Nielsen Sambandspartiimeersoq ulluni makkunani Reykjavikimiippoq, Savalimmiullu sinnerlugu Issittumi Siunnersuisoqatigiit ataatsimiinnerannut peqataalluni. Taassuma Kringvarp Føroya-mut oqaatigaa, akiuussutissaq savalimmiuni atorneqartoq maannamut pitsaanerpaasoq.

Lagmandip pisoq ajusaarnarnerarpaa.

- Naalakkersuisut akornanni assigiinngitsunik isumaqartoqartarnera nutaajunngilaq, soorunami naalakkersuisup isummaminik tamanut saqqummiussinera akornusiisinnaavoq. Pisoq oqaloqatigiissutigissavarput, taamatullu pisoqaqqissanngilaq, Bárður á Steig Nielsen tKringvarp Føroya-mut oqarpoq.

Powered by Labrador CMS