Savalimmiuni politikeri: Naalagaaffeqatigiinneq isumassarsiatsialaavoq
Akisussaaffiit suli amerliartortutut ataasiakkaarlugit Kalaallit Nunaannit akisussaaffigineqalertarnissaat, Kalaallit Nunaannut iluaqutaanerpaassaaq. Taama isumaqarpoq savalimmiormiu politikeri ukiorpassuarni namminiilivinnissamik oqariartuuteqartarsimasoq, maannali naalagaaffeqatigiinnermik attasserusulersimasoq.
- Naalagaaffeqatigiinni Savalimmiut Danmarkimit nammineersinnaaneruvoq, tassa Danmark EU-mut tunngatillugu nammineersinnaannginnerugami, ajorsitsaarisumik taama oqartoq tassaavoq Savalimmiormiut Socialdemokratit, Javnaðarflokkurin, sinnerlugit folketingimut ilaasortaq Sjúrður Skaale.
Taassuma atuagaq nutaaq ”Da Færøerne ville løsrive sig” (Savalimmiut taamani avissaarusulermata) saqqummerseqqammerpaa.
Aviisi AG taama allappoq.
Skaale Savalimmiut Danmarkimit avissaarnissaannik ukiorpassuarni ilungersuuteqareerluni, naalagaaffeqatigiinnik illersuisunngorsimavoq. Qeqertanut 18-iusunut Atlantikup avannaaniittunut taamaallaat 52.000-inik inulinnut aaqqiissutissaq tamanna pitsaanersaasoq, taanna isumaqarpoq. Tassa Danmark akuliuteqattaarani Savalimmiormiut namminneq isumagitissinnaappagit.
Savalimmiut ullutsinni aningaasaqarnermigut ingerlalluarpoq ingerlatsinerminilu annerusumik naalagaaffittut namminersortutut ingerlatsilluni. København annerusumik tusarfigisarnagu.
Taanna aamma isumaqarpoq, Kalaallit Nunaat naalagaaffeqatigiinniiginnaruni inissisimalluarnerussasoq. Massakkorpiaq namminiilivinnissamut taarsiullugu Kalaallit Nunaata akisussaaffiit Danmarkimit akisussaaffigineqartut alloriartarnermigut ataasiakkaarlugit isumagisarilertariaqarpai. Taamaaliornermigullu Danmarkimik pinngitsuuisinnaanini qimakkiartuaassallugu.
- Namminiilivinneq suaarutigiinnarneqarsinnaanngilaq. Tamanna tiguneqartussat tulleriiaarlugit isumagisarilernerisigut ineriartortinneqartussaavoq. Piitsuussutsip ajornartorsiutillu allat akiornerisigut. Aningaasaqarneq pingaartuuvoq. Illu toqqavianit aallartilluni sananeqassaaq – qalianit aallartinnani, Skaale oqarpoq.
Ukiorpassuarni namminiilivikkusuttunut akooreerluni, eqqarsartaaseq persuarsiorpaluttoq taanna uumigilerpaa. Sjúrður Skaale Republikanerit sinnerlugit Lagtingimi 2008-mit 2011-mut ilaasortaavoq. Taakkunaniilli anilluni Socialdemokratinut ilaasortanngorluni.
- Isummat suliniarnermi tunngavigisat partiimi aallunneqarpallaaramik piviusut aallunneqarpiaratik. Inuit nalinginnaasut ulluinnarni inuunerat uannut pingaarnerugami. Aalisakkanik suliffissuarmi sulisartup atugarissaarnissaa pingaarnerugami, taanna oqarpoq. Atugarissaarnissaq pingaarnerutillugu namminiilivinnissamik eqqarsaatit pavaniittut tunulliunneqartariaqarput, Skaale isumaqarpoq.
Naalagaaffeqatigiit usornartuusut
Naalagaaffeqatigiinni maanna atuuttuni inuiaqatigiit atugarissaartut siuariartorluarnerusinnaapput.
- Naalagaaffeqatigiinneq eqqumiitsumik taaneqarsinnaasumik ilusilersugaavoq. Pitsaanersaavorli. Ataatsimoornerlu taamaallaat atasinnaalluni suleqatigisanut naammattumik inissaqartitsinikkut, Savalimmiormiut folketingimut ilaasortaatitaat oqarpoq.
Kalaallit Nunaanni aamma Savalimmiuni namminersorluni oqartussaaneq Europami sumi tamaani usorineqarpoq, nunammi immikkoortui soorlu Catalonia aamma Skotland naalagaaffimmit attavigisaminnit avissaarnissaminnik takorluugaqarmata.
Aviisimi AG-mi atuarnerusinnaavutit. Aviisi uani pisiariuk: