Savalimmiuni namminiilivinnissaq pillugu oqallinneq ministeriunerup isornartorsiorpaa
Savalimmiuni lagtingimi siulittaasup Páll á Reynatúgvup (Tjóðveldi) folketingimut ilaasortaatitaqartarnerup atorunnaarsinneqarnissaa pillugu siunnersuuteqarnera ministeriunerup Lars Løkke Rasmussenip (V) isornartorsiorpaa.
Namminiilivinnissaq pillugu oqallinneq avaqqunneqarpoq, ministeriuneq isumaqarpoq. Tassungalu tunngatillugu Savalimmiuni namminiilivinnissaq pillugu taasissutigineqaqqaartussaavoq.
Savalimmiunit folketingimut ilaasortaaffiit atorunnaarsinneqarnissaat pillugit lagtingimi siulittaasup siunnersuutaa marsip 12-anni Folketingimi oqaluuserineqarpoq.
Sjúrður Skaale, Javnaðarflokkurinimi (Socialdemokraterne) folketingimut ilaasortap, uani qinigaaffimmi akunneq apeqqarissaarfiusumi sivitsukkami apeqqut taanna qaqippaa.
Savalimmiuni lagtingimi amerlanerussuteqartut Folketingimut qinersisoqannginnissaanik kissaateqassagaluarpata, Danmark qanoq qisuariassanersoq, Sjúrður Skaalep apeqqutigaa. Savalimmiunit inatsisinut allannguutissat Folketingimi akerlilerneqanngisaannartut, Sjúrður Skaale naqissusiivoq.
- Akuerineqassappat inatsisitigut nalilersuititsissaanga. Folketingimut qinersisoqannginnissaanik uanga aamma folketingi pisussaaffilerneqarpata, taava inatsisit inatsisaapput, Lars Løkke Rasmussen akivoq.
Sjúrður Skaalep partiiata siunnersuut tapersinngikkaa oqaatigaa, kisianni tunngaviusumik inatsimmi paragraf 32-imi savalimmiormiut aamma kalaallit folketingimut ilaasortaatitaat pillugit immikkut ittumik inatsisiliortoqarsinnaavoq.
Oqallinneq isornartorsioraa
Lars Løkke Rasmussen aamma naalakkersuinermik ingerlatsinermut sammisumik akissuteqarpoq. Tassanilu naalagaaffeqatigiinnermi avissaartuutsitsiniarsarineq isornartorsiorpaa.
- Namminiilivinnissaq pillugu oqallinneq taamatut sangutinneqartoq eqqumiigaara. Soorlu attaveqatigiinneq iluanit piiarneqartoq. Ammasumik savalimmiormiunik avissaarnissamut taasititsinermut tamanna taarsiunneqarpoq, Lars Løkke Rasmussen oqarpoq.