Savalimmiuni naalakkersuinikkut ajornartorsiortoqarnera radariliinissamut eqquisoq

Nunanut allanut naalakkersuisup Jenis av Ranap Midterpartiimeersup neriuutigisimanerarpaa, ukioq manna kallerisaarummik radariliinissaq pillugu Danmarkimi naalakkersuisut isumaqatigiissuteqarfigineqarumaartut. Tamannali pisimanngilaq.

Naalakkersuisut siulittaasuata illersornissamullu ministerip Trine Bramsenip piumasaqaatissat isumaqatigiissutigisimavaat, suliarlu maanna nunanut allanut ataatsimiititaliami suliassanngortinneqarsimalluni. Suliassarli ataatsimiititaliami uninngatinneqarpoq, Sambandspartiip, Folkeflokkenip Midterpartiillu akunnerminni naalakkersuinikkut suleqatigiinnerat ajalusooriaannaammat.

- Politikkikkut inissisimanerup aaqqiiffigineqarnissaata tungaanut aalajangiisoqanngikkallassaaq. Naalakkersuisooqatigiit ingerlaannassanersut naluarput, taamaammat suliassaq aalajangiiffigineqanngikkallassaaq, Bill Justinussen nunanut allanut ataatsimiititaliami siulittaasuusoq aamma Midterpartiimi ilaasortaasoq oqarpoq.

Naalakkersuisooqatigiit isumaqatigileqqittariaqartut

Lagmand Bárður á Steig Nielsenip Sambandspartiimmerup tamanna juullip kingornanut immaqalu ukiortaap kingornanut utaqqissunniarpaa, tassa naalakkersuisooqatigiit ingerlaannarsinnaanersut paaseqqaarusukkamiuk.

Naalakkersuisut ajornartorsiuteqalersimapput, anaanaqatigiit pillugit illuatungiliuttut siunnersuutaat, lagtingimi partiit naalakkersuisuutitaqartut marluk ikiorsiullugit lagtingimi akuerineqarmat.

Taasisoqarmat lagtingimi ilaasortaasunit 33-usuni 18-it siunnersuummut akuersaarsimapput. Naalakkersuisooqatigiinneersut pingasut illuatungiuttunut tapersiillutik taasisimapput. Tamanna naalakkersuisooqatigiit suliani tamakkiisumik isumaqatigiinngisutaasuni ataatsimoornissaannik isumaqatigiissutaannut toqqaannartumik akerliuvoq.

Folkeflokken siunnersuutip akuerineqarsinnaanera akornguserniarlugu sakkortuunik oqaaseqartarsimavoq. Siunnersuutip pingajussaanik decembarip 20-ani suliarineqarnissaa sioqqullugu, aalisarnermut naalakkersuisoq Jacob Vestergaard aamma isumaginninnermut naalakkersuisoq Elsebeth Mercedis Gunnleygsdóttir naalakkersuisutut atuuffimminnit tunuariarlutik lagtingimi ilaasortanngoqqissimapput, tassani parteeqatertik Annika Olsen partiimit anisinniarsariniarlugu.

Radari isumaqatigiinngissutaasoq

Brandur Sandoy, Annika Olsen peqatigalugu nunanut allanut ataasimiititaliami ilaasortaasimasoq, siunnersuutip pingajussaanik suliarineqannginnerani Kringvarp Føroyamut oqarsimavoq, radari pillugu suliaq naalakkersuisooqatigiinni isumaqatigiinngissutaasoq.

Jacob Vestergaardip radarip pisariaqassusaa siusinnerusukkut qularnartoqartissimavaa, Ukioq manna maajip qaammataani oqaatigaa, russit Savalimmiut imartaanniittut silaannartaanniittulluunniit Savalimmiomiunit ajornartorsiutitut isigineqanngitsut.

Jacob Vestergaardip aamma Folkeflokkenimi ilaasortat allat kissaatigalukku oqaatigisimavaat, radarimik sakkutuut timisartuinik nakkutilliisussamik ikkussinissamut Danmarki akuerineqassappat, Savalimmiut aamma pissarsisariaqartut. Soorlu EU.mik niueqateqarnissamut pitsaanerusumik isumaqatigiissuteqarnissaq pissarsiarineqarsinnaasoq.

Tamanna Ministeriunerup Mette Frederiksenip itigartissimavaa.

– Taakku pineqartut marluk – suliamut attuumassuteqartupilussuit, tassa sillimaniarnermut politikki aamma niuernermut politikki - imminnut attuumassuteqanngillat, pineqartulli siuarsaaffigerusuppavut, Mette Frederiksern ulloq 13. april oqarsimavoq.

Bill Justinussen Kringvarp Føroyamut oqarsimavoq, at både Jacob Vestergaard Elsebeth Mercedis Gunnleygsdóttirilu nunanut allanut ataatsimiititaliami ilaasortanngortinneqarnissaat ilimanartoq.

- Naalakkersuisooqatigiit ingerlaannassagunik, sulia nunanut allanut ataatsimiititaliami ilaasortat sinneri peqatigalugit oqaluuserineqarnissaanut periarfissaqassapput, Bill Justinussen oqarsimavoq.