Savalimmiuni mittarfik ukiumut millioninik ilaasoqartalerusuppoq
Savalimmiuni mittarfituaq Vágar Lufthavn Naalagaaffeqatigiinni mittarfiit anginersaat tallimaraat. Mittarfik siunissamut anguniagaqarluarpoq
Savalimmiuni mittarfik Vágar Lufthavn 2012-imit ukioq kingullermut tikittartut aallartartullu marloriaatinngortinnikuuai, tassami ukioq kingulleq kisitsit 425.000-imiippoq. Tikittut aallartullu ukiumut 1 millionngornissaat ukiunut 20-nut tulliuttunut anguniagaavoq.
Business Traveller allappoq.
Ineriartornissaq naatsorsuutaavoq
Vágar Lufthavn 1.250 meterinit 1.799 meterinut tallineqarpoq 2011-imi, ineriartortoqarluarneranullu pissutaasunut ilaavoq maanna mittarfimmit tikittut aallartullu ukiumut 425.000-nngorsimammata.
2012-imi kisitsit 225.000-ivoq, ukiuni arfineq marlunni 90 procentimik ineriartortoqarluni.
- Ukiuni 20-ni tulliuttuni 1,0 millioninit 1,1 millioninut mittarfimmut aallartoqarlunilu tikittoqartalernissaa naatsorsuutaavoq, mittarfiup pisortaa Regin I. Jakobsen oqarpoq.
Hotelinik sanaartorneq
Hotelini inissat marloriaatinngortinneqartussaapput ukioq manna. Torshavnip eqqaani Hotel Brandan maajimi ammassaaq, Hotel Hilton aamma maanna sananeqaleruttorluni. Klaksvik-imi aamma hoteleqalernissaa oqaluuserineqarpoq.