Skip to main content

Savalimmiuni covid-19-imik tunillatsittut aatsaat taama amerlatigisut

Savalimmiuni inatsisartut najukkami killilersuinernik atuutilersitseqqipput. Nappaalanerup aallartinneraniilli Savalimmiuni tuniluunneq nutaaq aatsaat taama annertutigaaq. Danmarkimi tuniluunneq aamma annertusivoq.

Piffissami kingullermi Savalimmiuni tuniluunneq qaffariangaatsiarpoq. Oktobarip 23-anni ullup ataatsip ingerlanerani tunillatsittut 89-iupput, oktobarillu 24-anni tunillatsittut nutaat 78-it nalunaarsorneqarput. Ataasinngornermi tunillatsittut 99-it nalunaarsorneqarput, taamaalilluni tunillatsissimasut katillutik 379-iupput. Savalimmiuni ulluni ataasiakkaani tunillatsittut siumorneqartut aatsaat taama amerlatigipput.

Oktobarip 24-anni Savalimmiuni tunillatsissimasut katillutik 290-iupput, aatsaallu tunillatsissimasut taama amerlatigipput. Nappaatip siaruarnerata tunillaassortunik nappaalanersuaqarneranut ataatsimiititaliarsuup ataatsimeeqatigineqarnerata kingorna, inatsisartut illoqarfinni killilersuinermik atuutilersitsinerannik kinguneqarpoq.

- Peqqinnissaqarfimmi oqartussat pissutsit malinnaaffigiinnavippaat, sumiiffiillu ilaanni nappaammik siaruarfiusuni iliuuseqartoqarnissaa maanna pisariaqalertoq nalilerparput, lagmand Bárður á Steig Nielsen taama oqarpoq.

Atuarfiit matuneqarput
Tunillatsittut amerlanerit avannaata kangianiipput. Kommunit eqqugaanerpaat tassaapput Klaksvíkar Kommuna, Eysturkommuna aamma Fuglafjarðar kommuna.

Klaksvíkimi atuarfik, Savalimmiuni illoqarfiit annersaasa tullianiittoq, sapaatip-akunnerani atuartitsineq killilertariaqarpaa. Taamaallaat meeqqat 3. klassit tungaannut atuariartorsinnaapput, sinnerilu ungasianit atuartinneqassapput.

Avannaata kitaani ilinniarnertuunngorniarfik matuneqarpoq, ilinniartullu aamma ungasianit ilinniartinneqassapput.

Meeqqat inuusuttullu akornanni tuniluuttoq
Meeqqanut inuusuttunullu sunngiffimmi sammisaqartarnera aamma killilerneqassasoq oqartussat innersuussutigaa. Aaqqissuussat meeqqat inuusuttullu nuna tamakkerlugu peqataaffigisaat kinguartinneqarput.

Savalimmiuni nakorsaaneq Lars Fodgaard Møller, tuniluunneq ingammik meeqqat inuusuttullu akornanni pisoq, Savalimmiuni tusagassiorfinnut ilisimatitsissutigaa. Unammiuaarneq inuusuttunit nuna tamakkerlugu ataatsimoorfiusoq siaruartitsiffiungaatsiarsimavoq.

Akiuussuserneqanngitsut immikkut pineqanngitsut
Tunillaassortunik nappaalanersuaqarneranut ataatsimiititaliarsuup innersuussutai amerlanerit malinneqartut, lagmandip Kringvarp Føroyamut ilisimatitsissutigaa. Tassanili coronapassimik atuutilersitsinissamik aamma akiuussuserneqarsimasut akiuussuserneqarsimanngitsullu assigiinngitsumik pineqarnissaannut innersuussutit atorneqanngillat.

- Innuttaasup akiuussuserneqassanerluni nammineq aalajangissavaa, innuttaasullu ataasiakkaat akiuussuserneqarumanngikkunik peqqissutsikkut kingunerisinnaasai nammineq akisussaaffigissavaat, lagmandi oqarpoq.

Misissuinerup unitsinneqarnerani amerleriartut
Kikkut tamarmik Savalimmiunukartut nunap killingani misissorneqartarnissaat, ukioq ataaseq sinnerlugu piumasaqaataavoq. Piumasaqaat taanna septembarip aallaqqaataani atorunnaarpoq, tassanngaanniilli tuniluunneq annertusiartorpoq. Piumasaqaat atuutilerseqqinneqartariaqartoq, Christian Andreassen, lagtingimi partiimi Folkeflokkenimi naalakkersuisoqataasunut ilaasortanut siulittaasoq, Facebookimi taama allappoq.

- Tunillaassortunik nappaalanersuaqarneranut ataatsimiititaliarsuup piumasaqaatip atuutilerseqqinneqarnissaa innersuussutiginngilaa, taamaammat maannakkut pilersaarutaanngilaq. Tuniluunneq inuiaqatigiit iluanni pisoq, peqqissutsimut oqartussat aamma oqaatigaat, avataaniillu annertuumik tunillaassuisoqarpasinngitsoq, lagmandi Kringvarp Føroyamut taama oqarpoq.

Inuk ataaseq maanna napparsimmavimmi uninngavoq.

Innuttaasut 70 procentii akiuussutissamik marloriarlutik kapitissimapput, 73 procentillu ataaseriarlutik kapitissimallutik. Nappaalanersuup aallartinneraniilli inuit marluk covid-19-imik toqquteqarput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER