Savalimmiuni coronapassi atorunnaarneqartoq

Coronapassimik atuinissaq isumaaruppoq, taamaammallu Savalimmiuni naalakkersuisut aalajangersimapput, coronapassip covid-19-ip siammaanneranut unikaallatsitsisussatut sakkutut januaarip qulinganiit atorunnaarneqassasoq.

Savalimmiuni naalakkersuisut nappaalanersuaqarneranut attatsimiititaliaq coronapassip atorneqartarnera pisariaarunnersoq pillugu nalileeqqusimavaat.

Nappaalanersuaqarneranut ataatsimiititaliap naliliinermini inerniliussimavaa, Savalimmiuni coronapassip atorneqarnissaanut peqqissutsitsigut tunngavissaarussimasoq, nunanulli allanut angalanermi suli pisariaqartinneqassasoq oqaatigalugu.

- Oqaatigiuaannarsimavara, coronapassi pisariaqavitsinnagu atorneqartariaqanngitsoq. Taamaammat nuannaarutigaara, aaqqissuussap tamatuma atorunnaarsinneqarnera, lagmandi Bárður á Steig Nielsen oqarpoq.

- Peqatigitillugu pingaartillugu oqaatigissuara, coronap tuniluunnera suli annertummat. Taamaammat inuit mianerinissaat, misissortittarnissaat pingajussaanillu akiuussutissalerneqarnissaat suli pisariaqarpoq, lagmandi erseqqissaavoq.

Tuniluuttoqarnera aqunneqarsinnaanngitsoq

Kalaallit Nunaannisulli Savalimmiuni inuit coronamik eqqugaasimaqaat tunillaassuinerlu suli annertulluni. Akiuussutissalerneqarneq napparsilavallaalernissamut illersuutaavoq, Deltalli tuniluunneratuulli tuniluuttoqarneranik pinngitsoortitsisinnaanani.

Tunillatsissimasut amerlagaluaqisut napparsimmavinni uninngasut amerlavallaarsimanngillat. Marlunngornermi januaarip aqqarnani Savalimmiuni inuit tallimat uninngapput. Januaarillu aqqarnani tunillatsissimasut katillutik 1666-iusimallutik.

Nunarsuarmi tuniluuttoqarnerata tamarmiusup nalaani inui katillutik 8312-it tunillatsissimapput, taakkua affaat sapaatip-akunnerini kingullerni tallimani tunillatsissimallutik.

Atorunnaarsitsinissamik periusissiaq eqqartorneqartoq

Savalimmiuni naalakkersuisut aamma nappaalanersuaqarneranut ataatimiititaliamut piumasarisimavaat, allannguut omikron allannguutinut allanut sanilliulluni ajunnginnerusumik atorneqartartoq paasinarsissappat, coronap atuunnerani iliuuserineqartartut atorunnaarsinneqarnissaannik periusissiaq oqaluuserissagaat.

Nappaalanersuaqarneranut ataatsimiititaliaq qanoq iliortoqarnissaanik suli siunnersuuteqarsinnaannginnerarsimavoq, omikronimut ilisimasat suli killeqarnerat pissutigalugu.

Nappaalanersuaqarneranut ataatsimiititaliap killilersuutit maanna atuuttut ilaat sakkukilleqassanersut aamma oqaluuserisimavaa.

Powered by Labrador CMS