Savalimmiuni coronamik toqussuteqartoq siulleq nalunaarsorneqarsimavoq

Angut 68-inik ukiulik Savalimmiuni siullersaalluni covid-19-imik toqussuteqarsimavoq. Angut nappaammik allamik ulorianartumik nappaateqarluni napparsimmavimmut unitsinneqarsimavoq, januaarillu tallimaani toqusimalluni, Savalimmiuni peqqinnissatigut oqartussat ilisimatitsipput.

Angut 68-inik ukiulik allamik ulorianartumik nappaateqarluni Tórshavnimi napparsimmavimmut decembarip aallartinnerani unitsinneqarsimavoq. Juullinngitsiartoq coronamik tunillatsissimasoq paasineqarmat coronamik nappaatillit uninngaviannut nuunneqarsimavoq.

Peqqinnissatigut oqartussat ilisimatitsipput, angut Covid-19-imik naappaateqarluni toqusimasoq, oqaatigerusunngilaalli suna toqussutigisimaneraa.

Nunap napparsimmavissuani pisortap tullia Tummas í Garði oqarpoq, angutip sumik ajoquteqarnera sumillu toqussuteqarnersoq pillugu immikkuualuttunik oqaaseqarsinnaanani.

Utoqqaat illuani sulisoq tunillatsissimasoq

Savalimmiut juullip kingorna coronamit eqqugaangaatsiarsimavoq, Juullip ukiortaallu akornanni inuit 19-it ullup ataatsip ingerlanerani tunillatsissimapput. Ukiortaarlu aallartimmalli ullormut inuit arfinillit angullugit tunillatsissimasarsimallutik.

Tórshavnimi utoqqaat illuat ataasinngormat coronamit eqqugaasimavoq, tassani sulisoq ataaseq tunillatsissimagami. Tuniluuttoqanersoq maanna misissuiffigineqarpoq.

Nunamut allamut unamminissaq taamaatiinnarneqarsimasoq

Tjekkiami assammik arsarlutik nunanut allanut unammisartut arfineq-pingasut Savalimmiunut tikinnerminni coronamik tunillatsissimasut paasineqarsimapput.

Savalimmiuni assammik arsarluni nunanut allanut unammisartut marlunngormat unnukkut arfineq-pingasunut (savalimmiuni nalunaaqutaq malillugu) EM-imut anngunniullutik Tjekkiamiunut angerlarsimaffimminni unammisussaasimagaluarput. Unaminissaq taamaatiinnarneqarsimavoq.

- Tjekkiamiut nunanut allanut unammisartui Savalimmiunut ippassaq namminneq timmisartuminnik tikimmatali piumasaqaatit sakkortuut malinneqarsimapput. Tassa unammiat timmisartoqarfimmi, bussimi akunnittarfimmilu taamaallaat uninngasarsimallutik. Unammiartoraluartut ullumi angerlarlutik aallassapput, assammillu arsartartut kattuffiata peqqinnissatigut oqartussat Europamilu assammik arsartartut kattuffiat attaveqarfigiuarpaat, Savalimmiuni assammik arsartartut kattuffiat nittartakkamini allappoq.

Angerlarsimaffimmi kingusinnerusukkut unammisoqassanersoq imaluunniit Tjekkiamut unamminissaq arfininngorpat Tjekkiami ingerlanneqassanersoq imaluunniit taamaatiinnarneqassanersoq suli aalajangiiffigineqanngilaq.

Powered by Labrador CMS