Savalimmiuni aserfallatsaaliinissaq pissutigalugu ullualunni takornarialerisoqassanngilaq
Takornariaqarneruleriartornerup kingunerisaanik qeqertat 18-iusut aserfallatsaalinerunissaat pisariaqarnerulersimavoq. Visit Faroe Islands taamaammat takornarianik suleqataaqqusilluni neqeroorpoq. Suleqataajumasut akeqanngitsumik nerisaqartinneqarlutillu ineqartinneqassapput.
Savalimmiuni suliniuteqartoqarpoq, nunallu tamalaat akornanni nutaarsiassani eqqaaneqartuarnera naatsorsuutigissagaanni, Visit Faroe Islands suliniumminik avammut saqqumititsinera iluatsilluarsimavoq.
Savalimmiuni ulluni apriilip 26-ani 27-anilu nalinginnaasumik takornarialerisoqassanngilaq. Takornarialli kajumissutsiminnik aserfallatsaaliisunut ikiuukkusuttut, piffissami tassani akeqanngitsumik nerisaqartinneqarlutillu najugaqartinneqassapput.
Savalimmiut ukiut tamaasa 100.000-t missaannit takornariarneqartarpoq. Sulinngiffeqarnerullu nalaani tikinneqakulanerup kingunerisaanik qeqertat malunnaateqalersimapput.
Sapaatip akunnerata naanerani piffissaliunneqarsimasumi pisuinnaat aqqutaat aserfallassimasut iluarsartuunneqassapput, aammalu nutaanik pisuffissanik aqqutissiortoqassalluni, asimi pisuttuarniartut sukkut tamaana pisuttannginnissaat anguniarlugu.
Piujuaannartitsinissaq siunertaavoq
Visit Faroe Islandsip Savalimmiut ukiuni kingullerni “untouched”, “unspoiled”, “unpolluted” -itut (“Attorneqanngitsoq, sequminneqanngitsoq, mingutsinneqanngitsoq”, aaqq.) nittarsaappaa.
Taama nittarsaassinerup kingunerisaanik takornariat amerlanerusut tikittalerput, takornariaqalernerli aamma akerlerineqarpoq. Takornariat asimi sukkut tamaana pisuttarnerat nunaatillit iluarinngilaat. Nunaatillit isumaqarput nunaatiminni pisuttut akileeqqusinnaallugit imaluunniit nunaatiminni pisoqqusinatik inassuteqarsinnaallutik.
Nunaatillit pinngortitamut akitsuuteqaqqusisut
Nunaatillit politikerinut sunniiniarput, nunanit allaneersut pinngortitami pisuttuarnerminni akiliisalernissaannut aaqqissuussisoqarnissaa anguniarlugu.
Savalimmiuni inuussutissarsiornermut naalakkersuisoq Poul Michelsen (Framsókn), februaarip aallartilaarnerani Visit Faroe Islandsimit nalunaarusiamik tunineqarpoq, tassani takornariaqarnerup 2025-mi qanoq aaqqissuunneqarnissaa pillugu nalunaarusiortoqarsimalluni.
Nalunaarusiami pingaartinneqarpoq Savalimmiuni takornariaqarnerup piujuaannarnissamik tunngaveqarnissaa.
Pitsaassuseq amerlanerussusiunngitsoq
Nalunaarusiami qitiutinneqarpoq Savalimmiut siunissami tikittut amerlaneruunnarnissaat pinnagu pitsaassutsimik pingaartitsinerusariaqartoq. Ima paasillugu, takornariat tikittut atorluarneqarnerusariaqarput, takornariarlutik tikittut amerlanerulersinniaannarnagit.
Kaaviaartitat ullumikkut 600 milliuunit koruuniupput, ukiulli arfinillit qaangiuppata kaaviaartitat 1,5 milliardit koruuniusariaqarput, Visit Faroe Islandsimit innersuussutigineqarpoq.
Takornariaqarnerulernissaq anguniarneqaraluarpalluunniit, pinngortitap pitsaasuunissaa pingaartinneqartuaannassaaq. Nalunaarusiami ilanngullugu innersuussutigineqarpoq takornariat akitsuummik nunap karsianut akiliisinneqartalissasut, aningaasallu taakku pinngortitap aserfallatsaalineqarnissaanut atorneqartassasut.
- Takornariaqarneq silatusaartumik ineriartortinneqarsinnaappat inuussutissarsiutaalersinnaavoq pingaaruteqartoq periarfissanillu ulikkaartoq. Nunap iluani tamarmi uummaarinnermik ineriartornermillu tunisisinnaavoq. Inuussutissarsiornermi tassani periarfissat tamaasa atornissaat pisariaqarpoq. Anguniagassanik piumasaqaatinillu qaffasissunik inissiinikkut tamanna angusinnaavarput, Poul Michelsen, Visit Faroe Islandsimit nalunaarusiamik tunineqarami taama oqarpoq.