Savalimmiuni aningaasaqarnikkut ingerlalluartoqarpoq

Savalimmiuni aningaasaqarneq ukiuni arlalinni ingerlalluarsimaqaaq, maannalu aningaasaqarneq qaffasinnerpaamiilersimasutut isikkoqarluni. Nationalbanki Savalimmiut aningaasaqarnerat pillugu nassuiaasiukkamini kingullermi taamatut oqarpoq.

Nationalbankimit inerniliunneqarpoq, avammut tunisaqartarneq 2020-mi annikilleriarsimasoq. Tunisassiat avammut tunineqarsimasut nalingi siornamut sanilliullugu 2020-mi qaammatit qulingiluat ingerlaneranni syv procentimik annikilleriarsimapput. Pingaartumik kapisillit saarulliillu avammut tunisat nalingi apparsimapput.

Maluginiarneqartariaqarporli, 2019-imi annertuumik siuariartoqarsimanera, tassanilu pingaartumik aalisakkat avammut tunineqarsimasut tunngaviullutik. Coronap ajornartorsiortitsinera avammut tunisat annikilliartornerannut pissutaavoq.

- Ukioq manna avammut tunisat annikillinerannut pingaartumik pissutaavoq, nunat kitaamiut aningaasaqarnerannut sunniuteqartumik coronavirusip tuniluunnerata siaruaannera pisstugialugu avammut tunisaqartarnerup qularnarsisimanera, Nationalbanki nassuiaammini allappoq.

Siusinnerusumut sanilliullugu piareersimaneruneq

Aningaasaqarnikkut ingerlalluarneq qaffasinnerpaamut inississimagaluartoq, Savalimmiuni aningaasaqarneq ajunngitsumik ingerlavoq. Avammut tunisat 95 procentii aalisagaapput, siusinnerusumulli sanilliullugu aalisarneq immikkoortunut pingasunut avinneqarsimavoq: 1) aalisakkanik tukertitsiveqarneq, 2) ikerinnaasiortunik aalisarneq aamma 3) natermiunik aalisarneq.

Tassa natermiunik aalisarneq akigititat appasinnerannit aalisarnerlunnermilluunniit eqqugaassagaluarpat, allatigut aalisarnerup avammut tunisaqartarneq ingerlatsiinnartarpaa. Peqatigitillugu suliffeqarfiit niuerfigisartakkaminnik siammaanissamut pikkoriffeqarsimapput, tassa tunisassiatik nunanut allanut tunisinnaasarsimavaat aamma tunisassiat assigiinngitsut tunisalersimallutikkit.

Nationalbankip nalilerpaa, Savalimmiut aningaasaqarnerat ukiut 10-15-it matuma siornatigornit ullumikkut patajaannerusoq.

Suliffeqarfiit Savalimmiunilu inoqutigiit siuariarneq aningaasaqarnerminnik isumannaallisaanermut atorsimavaat. Ukiunut aningaasarsiornikkut ajornartorsiorfiusimasunut sanilliullugu, coronap nunarsuarmi tuniluunnerata Savalimmiuni nunarsuullu sinnerani aningaasaqarnermut ukioq manna eqquinera anigorsinnasimavaat, Nationalbanki allappoq.

Avammut nussortoqannginnerulissasoq

Nationalbankilli siunissamut ungasinnerusumut qiviarnerami mianersorfissaqarnerarpaa. Utoqqaat amerliartuinnassapput innuttaasullu katitigaanera equngalissalluni.

innuttaasut amerlassusissaannut naatsorsuutit atuutiinnassappata, 2040-mi 20-t 69-illu akornanni ukiulinnit 70-it sinnerlugit ukiullit amerlanerulersimassapput.

Savalimmiormiut ukiut 30-t kingulliit ingerlarneranni avammut nussorsimaqaat, tassa 1990-ikkut qiteqqunneranni aamma 2010-kkut allartinneranni tamanna pisimavoq. Ukiunili kingullerni siuariartortoqarnerani Savalimmiunut nussortoqarluarsimavoq, innuttaasullu 53.000-it pallingajallugit amerlatigilersimallutik.

Aningaasaqarnikkut ingerlanerlunneq marloriaammik eqquisarpoq, akileraartartut avammut nussortarnerat pissutigalugu, taamalu inuiaqatigiit agguataasimanerat eqqarsaatigalugu unammillernarnerusarluni. Nationalbankilli misissuisimanermini inerniliuppaa, aningaasaqarnikkut ingerlalluarneq allanngorpat Savalimmiuni inuuniarnerup ullumikkut qaffassimanera pissutigalugu avammut nussortoqarpallaassinngitsoq.

Illuutinik piginnittuunermut akileraarutit

- Tamatuma takutippaa, psiortat aningaasaqarnerisa piffissami sivisuumi attanneqarsinnaanerannut tunngaviusut nalorninartoqangaatsiartut, Nationalbanki allappot, naalakkesuisunullu kaammattuutigalugu ilaatigut akileraarusersuisarnermik annertusaaqqullugit.

Assersuutigalugu illuutinik najugaqarfigineqanngitsunik piginnittuunermut akileraarusersuinikkut, isertitat amerlanerulissasut, Nationalbankimit oqaatigineqarpoq.

Inigisat akiisa ineriartornerat tunngavigalugu illuutinik piginnittuunermut akileraausiisarnikkut, tunisassiorneq naleqartitsisarnerlu aamma aningaasaqarnermik ingerlatsineq ingerlaannartumik patajaallisarneqassaaq, akileraarutinullu allarpassuarnut sanilliullugu equngalersitsivallaartarani, nationalbankimit oqaatigineqarpoq.