Savalimmiut

Savalimmiuni amerlanerussuteqartut naalagaaffeqatigiinnermik attassiinnarusuttut

Naak bloktilskudi peerneqarsimangaluartoq, Savalimmiuni amerlanerussuteqartut naalagaaffeqatigiinneq attatiinnarusuppaat. Tamanna inuit isumaannik paasiniaatitsisimanermi takuneqarsinnaavoq.

Grindefangst, Vágar, Færøerne
Savalimmiuni amerlanerussuteqartut naalagaaffeqatigiinnerup ingerlaannarnissaa kissaatigineqartoq, Gallup inuit isumaannik paasiniaanerani takuneqarsinnaavoq.

Savalimmiuni innuttaasut 61 procentiisa Danmarkimut attaveqatigiinneq massakkutut ittoq attatiinnarusuppaat, savalimmiuni nutaarsiassaqartitsiviup Sosialurinip, inuit isumaannik paasiniaasimanerat aallaavigineqarpoq.

Gallup Færøernemit misissuineq ingerlanneqarsimavoq, Zakarias Wangip kissaateqarneranit, taanna politologiuvoq Danmarkimiilli avissaarnissamut illersuisuulluni.

Inuit isumaannik paasiniaatitsisimanermi, bloktilskudi peerneqaraluarpat qanoq isummerfigineqassanersoq apeqqutigineqarsimavoq.

Akissutigineqarsinnaasimappulli:

  • Savalimmiut amt-inngortinneqassaaq
  • Danmarkimit avissaartoqassaaq
  • Danmarkimut attaveqatigiinneq allanngortinneqassanngilaq
  • Naluara

Takuneqareersutulli 61 procentiisa Danmarkimut attaveqatigiinneq allanngortikkusunngilaat. 30 procentit Danmarkimit avissaarusupput, 7 procentit naluaat kiisalu 2 procentit Savalimmiut amt-inngorteqqikkusukkaat, Sosialurin allappoq. Misissuinermi inuit 525-it apersorneqarsimapput.

Bloktilskudi peerneqarli

Zakarias Wangip Sosialurinimut oqaatigaa, misissuinerup takutikkaa, Danmarki Savalimmiunut bloktilskudikkut 600 mio koruunit sinnilaarlugit akiliisariaqanngitsoq.

- Danmarki Savalimmiunut akiliissaaraluarpalluunniit, savalimmiuni innuttaasunit attaveqatigiinneq allanngortinniarneqanngilaq. Tamanna qallunaat ukiuni hunnorujukkaani Savalimmiuniit tusartarsimasaannit akerlilerneqarpoq. Savalimmiuni partiit oqaatigisarsimavaat, qallunaat akiliissaaraluarpata Savalimmiuni innuttaasut avissaarusulissasut, Zakarias Wang oqarpoq.

Tamanna pissutigalugu taanna isumaqarpoq, qallunaat eqqarsarnerliorsimasut, savalimmiuni innuttaasut akilerneqassaarunik avissaarusulissasut.

Gallup Færøerne 2016-mi decembarip qaammataani Kringvarp Føroyarimut inuit isumaannik paasiniaatitsisimavoq. Taamani bloktilskudi peerneqaraluarpat 48 procentiisa avissaarnissaq akerlilersimavaat.

Powered by Labrador CMS