Savalimmiormiut Naalakkersuisuat Kalaallit Nunaannut tikeraalersoq
Savalimmiormiut Naalakkersuisuat pisortatigoortumik Nunatsinni tikeraarpoq. Naalakkersuisut paasissutissiisutaat naapertorlugit, Naalakkersuisoq ullumi arfininngornermi martsip 26-ani tikippoq, Nunatsinniisallunilu martsip 31-ata tungaanut.
Bárður á Steig Nielsen nunatsinni martsip ulluisa 26-ianit 31-ianut tikeraassaaq. Tikeraarnermini Naalakkersuisut Siulittaasuat Múte Bourup Egede ilaatigut ataatsimeeqatigissavaa. Naalakkersuisut taama tusagassiuutinut nalunaarummi allapput.
Naalakkersuisut tusagassiortunik katersortitsinissamut martsip 31-ani nalunaaqutaq 10.00 Hans Egede-p illuani qaaqqusipput.
Sammisat annertuut eqqartorneqassapput
Savalimmiormiut naalakkersuisuat Nunatsinni tikeraarnermini Naalakkersuisut siulittaasuata ataatsimeeqatiginerani ilaatigut aalisarnerup tungaatigut suleqatigiinneq, mittarfeqarnikkut takornariaqarnikkullu savalimmiormiut misilittagaat minnerunngitsumillu nunanut allanut sillimaniarnermut illersornissamullu kontaktudvalg-imi suleqatigiinneq eqqartorneqassapput.
- Bárður á Steig Nielsen-ip Imarsiornermik Ilinniarfik, Ilisimatusarfik aamma Greenlandic Greenhouse suliffeqarfiillu allat Nuummiittut pulaassavai. Taama Naalakkersuisut tusagassiuutinut nalunaarumminni allapput.
Naalakkersuisut martsip 31-ani tusagassiortunik katersortitsinissaminut suna sammineqassanersoq paasissutissiissutiginngilaat.