Skip to main content

Savalimmiormiut maanna puisinniartalerniarput

Savalimmiuni aalisarnermut ministeri kapisilinniarneq illersorniarlugu puisinniarnerup naleqqussarnissaanut inatsimmik siunnersuuteqarpoq.

Savalimmiut kapisilinnik avammut tunisisarnerat puisinniartarnermik aaqqiissuteqartoqanngippat tatisimaneqalersinnaavoq. Aalisarnermut naalakkersuisoq,  Høgni Hoydal (Tjóðveldi/Republikanerne), inatsisissatut siunnersuummik saqqummiussivoq, taanna savalimmiormiut immap pisuussutaanik atuisinnaanissaannut periarfissaqartitsivoq.

- Imaanit napatissinnaasumik piniarsinnaatitaanitsinnut aalaajangersaasumik inatsisiliussaagut. Tamatumunnga assingusumik timmissanut, aalisakkanut niisarnanullu inatsiseqarpugut. Pusiniarsinnaatitaavutit, kisianni akuersissummik peqaqqaassaatit, puiseqassutsimillu nalilersuisoqartassaaq, Høgni Hoydal Færøske Nyhedsbureaumut taama oqarpoq.

USA-mut tunisassiorneq ulorianartorsiortoq

USA-mut kapisilinnik tunisisarnerup allannguuteqarani ingerlanissaa, inatsisip qulakkiissavaa.

Inatsisissatut siunnersuummut oqaaseqaatini atuarneqarsinnaavoq, USA-p The Marine Mammal Protection Act atuutilersippaa.

Amerikamiut inatsisaat nunanut aalisakkanik aamma aalisakkanik nioqqutissianik USA-mut tunisisartunut piumasaqaateqarpoq. Aalisarnermut aamma aalisakkanik tukertitsinermut atatillugu immami miluumasunik saniatigut piniarnermut aamma puisinik toqoraanermut piumasaqaatit tunngapput.

- Kapisillit USA-mut tunineqassagunik, aalisakkanik tukertitsinermut atatillugu puisinik toqoraanermut pilersaaruteqarnermut inerteqquteqalertoqartariaqarpoq. Puisit atortunut aserorteritillugit toqutaqarnissaq pinngitsoorneqarsinnaanngilaq, kisianni sinaakkutit malinneqarlutillu nungusaataanngitsumik piasariaqarpoq, siunnersuummut oqaaseqaatini tamanna allaqqavoq.

Puisinniarnermut akuersissuteqartoqassaaq

Piffissami nutaajunerusumi Savalimmiuni puisinniartoqarneq ajorpoq. Puisinniarnerlu pillugu aamma inatsiseqanngilaq, kisianni uumasut peqqissusaat pillugu inatsit naapertorlugu puisit timmiarsiummik aallaaneqaqqusaanngillat, taamaallaat qoorortuumik pisarineqarsinnaapput.

Aallaasit pillugit inatsisip sukaterneqarnera sioqqullugu, kikkut tamarmik timmiarsiuteqarsinnaatitaapput, kisianni qoorortuumik pigisaqarniaraanni immikkut akuersissuteqartoqartariaqarpoq.

Taanna immikkut akuersissut aalisakkanik tukertitsiviliutilinnut tunniunneqartarpoq, puisit qanillivallaartut aamma atortunik ajortisaarisut toqussinnaaniassammatigit.

Inatsit nutaaq naapertorlugu peqassuseq pillugu ilisimasanik pissarsisoqassaaq, pisallu tamarmik nalunaarsorneqassallutik. Puisinniarsinnaanermut immikkut ittumik akuersissuteqartoqassaaq, akuersissullu taanna peqassusaa nungusaataatinnagu tukertitsiviutilinnut tunniunneqartassaaq.

- Nammineq inatsiseqarnitsigut tamanna aaqqissinnaavarput, taamaalilluta pisariaqanngitsumik tatisimaneqassanngilagut. Niisarnarniarnermi suliami taamatut aamma aaqqiivugut. Nammineq pisuussutitsinnik nungusaataanngitsumik piniarnitsinnut qulakkeerinnittumik inatsiseqassaagut. Tamanna uagutsinnut pingaartorujussuuvoq, Høgni Hoydal oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER