niisarnarniarneq

Savalimmiormiut ikiortariaqarpavut

Politikerit Danmarkimeersut niisarnarniarnerup unitsinneqarnissaanik Sea Shepherdimut piumasaqaammut nakkaannarumanngillat

Grindefangst, Midvágur, Vágar, Færøerne
– Isiginnaarlugu soorunami sakkortoorujussuuvoq, kisianni niisarnat uumalluarsimapput toqorarneqarnerallu sukkasoorujussuulluni, konservativeneersoq Rasmus Jarlov oqarpoq. Matumani Vágarimi Midvágurimi juuni niisarnarniarnermit siullermit.

– Isumaqarpunga Savalimmiormiut ikiortariaqarivut, arfanniarnerat uumasunik illersuiniaqatigiinnit akornuserneqaqqunagu, Konservativt Folkepartimeersoq Rasmus Jarlov Berlingske Nyhedsbureaumut oqarpoq nangillunilu:

– Isiginnaarlugu soorunami sakkortoorujussuuvoq, kisianni niisarnat uumalluarsimapput toqorarneqarnerallu sukkasoorujussuulluni. Isumaqarpunga pissutsit ajornerulersinniarnissaannut tunngavissaqanngitsoq, Rasmus Jarlov, Konservativit uumasut atugarissaarnissaat pillugu oqaaseqartartuat kiisalu Savalimmiunut Kalaallit Nunaannullu tunngasuni oqaaseqartartoq, oqarpoq.

Rasmus Jarlovip Sea Shepherdip Savalimmiuni akerliuniarnermik ingerlatsinera, Sermitsiaq.AG-mi niisarnarniarneq juunip 6-ani siulleq aallartimmalli allaaserineqartoq, innersuussutigaa.

Berlingskep nutaarsiassaqartitsivia Politiko naapertorlugu Savalimmiormiut niisarnarniarsinnaatitaanerat Danmarkimi politikerinit arlalinnit tapersersorneqarpoq.

Sea Shepherdip Savalimmiuni akerliuniarneranut tunngasunik annertunerusumik atuarit.

Akerliuniarnerat ingasattajaarnerullunilu pisuusaarneruvoq, Rasmus Jarlov oqarpoq, Politikolu naapertorlugu Savalimmiormiut qangatut piniarneranni ikiorumanerarlugit.

Avatangiisinik illersuiniaqatigiiffiup Sea Shepherdip akiuiniarnera uani aamma atuaruk.

Rasmus Jarlov nassuerluni oqarpoq, kangerliumarngup niisarnat toqorarneqartut aavannit aappaluttuinnanngornera sakkortuutut isikkoqartoq, toqoraanerli inuppalaartumik ingerlanneqartoq, uumasunillu illersuiniaqatigiiffiit akerliuniarnerat pisuusaarnerusoq.

Umiarsuup naalagaa Paul Watson, Sea Shepherdip Savalimmiuni akerliuniarneranut siuttuusoq, sorsuutit Danmarkimeersut Savalimmiormiut niisarnarniarneranni nakkutilliinerat unitsinniarlugu Danmarkimi Folketingimut ilaasortanut tamanut allagaqarsimavoq. Danmarkimili Folketingimut ilaasortat arlaannaannilluunniit Sea Shepherdip Savalimmiuni akerliuniarnera tapersersorneqanngilaq.

Paul Watsonip Facebookimi quppernermini allagai takukkit.

Folketingimut ilaasortap Konservativeneersup niisarnat uumasorpassuarnit Danmarkimi toqoraavinni toqorarneqartartunit inuppassuarnillu ullormut nerineqartartunit pitsaanerungaartumik uumasarnerat tikkuarpaa.

Taamaattumik Rasmus Jarlov Politiko naapertorlugu isumaqarpoq, pineqartup uumasunik illersuiniarnermi apeqquterujussuanngortinnera ingasattajaarnerusoq pisuusaarnerusorlu.

– Ilimagaara assilisat pikkunartut pineqarnerusimassasut, Berlingskep nutaarsiassaqartitsivianut oqarpoq.

Sea Shepherd maannakkorpiaq nammineq kajumissutsiminnik akerliussutsimik takutitseqataasunik nunarsuarmit tamarmeersunik arlalinnik Savalimmiuniititaqarpoq umiarsuarnillu arlalinnik niisarnarniarnermik pinngitsoortitsiniartunik tamaaniititaqarluni.

Rasmus Jarlovili erseqqissaavoq, niisarnat aarlerinartorsiortitaanngitsut.

– Piniagassanik ukiuni hundrederpassuarni piniarneqartarsimasunik piniarneq nalinginnaasoq pineqarpoq. Savalimmiuni kulturimut nerisaqarnermullu ilaavoq, Savalimmiormiullu soorunami taamaaliorsinnaatitaajuaannartariaqarput, Berlingskep nutaarsiassaqartitsivianut oqarpoq.

Paul Watson Sea Shepherdimeersoq isumaqataanngilluinarpoq. Savalimmiormiut ullumikkut angallatit motoorillit radionik atortorissaarutillit sakkullu nutaaliaasut atorlugit niisarnarniartarnerat innersuussutigaa.

"Kulturi maajunnartuliorpoq, arferimmi inunnit ajornartorsiortunit pisariaqartitsineq tunngavigalugu siornatigut toqorarneqartarsimapput. Maanna nuannariinnarlugu toqorarneqartalerput.« Facebookimini allappoq.

Paul Watson Savalimmiormiut niisarnarniarnerat pillugu oqarpoq »pissanganartorsiorlutik toqoraanerminni nuannaapiluppasittut, allaat malugisimaarpasingajalluti.« Tamatuma peqatigisaanik Danmarkip Savalimmiormiut niisarnarniarnermik ingerlatsiinnarsinnaanerannut akisussaaqataangaatsiarnera oqaatigaa.

»EU-mi inatsisit naapertorlugit arfernik toqoraanissaq inerteqqutaagaluartoq Danmarkimi naalakkersuisut toqoraanernik tapersersuisimapput,« Paul Watson Facebookimini allappoq, sorsuutillu Danmarkimeersut marluk niisarnarniarnerup nalaani Savalimmiuniitinneqartut innersuussutigalugit.

Paul Watsonip Danmarkimi Folketingimut ilaasortanit akissutisiani Facebookiminut iliorarsimavai.

Dansk Folkepartimeersoq, Martin Henriksen (DF), Savalimmiunut ataatsimiititaliamut Kalaallit Nunaannullu ataatsimiititaliamut ilaasortaasoq, Paul Watson naapertorlugu akissuteqarluni allassimavoq, Naalagaaffeqatigiinnermi inatsisit malittarisassallu oqartussanit atuutsinneqartussaasut.

– Tamanna Savalimmiuni pisunut akerliusunut soorunami aamma atuuppoq. Qallunaatut sorlaqarnera aamma kanngusuutiginngilara. Naamerluinnaq. Attaveqarfigeqqittariaqanngilarma, Martin Henriksen akivoq.

Parteeqataata Ib Poulsenip (DF) Paul Watsonip mailia aamma akisimavaa:

– Savalimmiormiut inuunertik atoriarlissuk, kulturiallu ataqqiniartigu. Nerisassaminik nillataartitsivimmut aalliinnartarnermik sungiusimannittumut tamanna soorunami ajornakusoorsinnaavoq.

Paul Watson nassuerpoq, Folketingimut ilaasortat 179-it arlalinnik allaffigisimasami arlaannaalluunniit Savalimmiuni niisarnarniarnermut akerliliisimanngitsoq. Dansk Folkepartiimut ilaasortanit marlunnit Savalimmiormiut niisarnarniarnerannik tapersersuisunit taamaallaat akissutisisimavoq.

Paul Watsonilli Savalimmiormiut ileqqutoqqaminnik aallussiinnarnerannik tunngavilersuut isumaqatiginngivippaa:

»Ileqqutoqaq taanna sakkutoqqanik soorlu umiatsianik motoorilinnik, amoorutinik hydrauliskiusunik, radionik, sonarinik sorsuutinillu atuiffiuvoq. Kulturi maajunnartuliorpoq, arferimmi inunnit ajornartorsiortunit pisariaqartitsineq tunngavigalugu siornatigut toqorarneqartarsimapput. Maanna nuannariinnarlugu toqorarneqartalerput.« allappoq tamatumalu peqatigisaanik avatangiisinik illersuiniaqatigiit allat kaammattorlugit Danmarkimi politikerinut niisarnarniarnermut akuliutitinniarlugit allagaqarnissaannik.

Paul Watson naapertorlugu nammineq kajumissutsiminnik akerliuniaqataasut Sea Shepherdimeersut arfineq-marluk ukioq manna niisarnarniartoqarnerani tigusarineqarsimapput. Avatangiisinik illersuiniaqatigiiffimmeersut 14-it siorna tigusarineqarput.

Powered by Labrador CMS