Skip to main content

Savalimmiormiut EU-mut isumaqatiginninniartut

EU Savalimmiunik niueqateqarnermi pitsaanerusumik isumaqatigiissuteqartoqarnissaanut ammavoq, Savalimmiut EU-llu allaqatigiittarsimanerannik takunnissimanerup tamanna takutippaa.

EU-kommissionimi siulittaasoq Ursula von der Leyen, EU-p Savalimmiullu niuernikkut maanna isumaqatigiissutaannik pitsanngorsaanissamik oqaloqatiginnikkusuppoq.

Tamanna lagmand Bárður Nielsenip aamma EU-kommissionimi siulittaasup allaqatigiittarsimaneranni, Det Færøske Nyhedsbureaumit takuneqarsimasumi allassimavoq.

- Illuatungeriilluni suleqatigiinnerup tamatsinnut iluaqutaasup aamma Europap kitaani nunanik eqqaamiutsinnik EU-mi ilaasortaanngitsunik suleqateqarnissamut EU-mi nalinginnaasumik  malitassatsinnut naapertuuttumik ineriartortinneqarnissaanut isumaqataavunga.

Ursula von der Leyen lagmandip juulip 23-ani allagaanut septembarip 21-ani akissuteqarluni taamatut allappoq.

Bárður Nielsenip allakkamini oqaatigaa, niueqatigiinnermi pitsaanerusumik isumaqatigiissuteqartoqarnissaa kiisalu ilinniartitaanerup, kulturip, nukissuuteqarnerup digitaliseeriinerullu iluini Savalimmiut EU-llu attaveqatiittarnerisa nutarterneqarnissaa pillugit isumaqatiginninniarusuttoqartoq.

EU-mi kiffaanngissuseqarluni niueqatigiinnissamik isumaqatigiissutip pitsanngorsaaffigineqarnissaa oqaluuserineqarusuppoq.

Arsaq Savalimmiunut tunniuneqartoq

Taakku marluullutik allaqatigiittarsimanerat pisortatigoortumik oqaaseqarsimanernik imaqarnerupput, aamma Savalimmiut EUllu qanorpiaq kissaateqarnerat erseqissumik oqaatigineqanngilaq.

Lagmandip allakkamini Savalimmiut EU-llu sutigut suleqatigiinnerat eqqartorpaa. Aamma aalisarnermik isumaqatigiissutip saniatigut Horizon 2020 pillugu ilisimatuussutsikkut suleqatigiittoqarlunilu niueqatigiinnissamik isumaqatigiissuteqarput.

Ursula von der Leyenip allakkami naggataatigut arsaq Savalimmiormiunut tunniuppaa, Savalimmiut isumaqatigiissumik sunik pitsanngorsaasoqarnissaanik kissatiminik oqaaseqarniassammat.

- EU-mi oqartussat siunnersuutinik tigussaasunik tigusaqarnissamut piareeqqapput. Allakkanni eqqaavatit Savalimmiut susassaqarfinnut pineqartunut qanoq isumaqarnersut, Ursula von der Leyen allappoq.

Aalisakkat Savalimmiuneersut 25 %-imik akitsuuserneqartartut
Savalimmiuni politikkerit akuttunngitsumik oqaatigisarpaat, Savalimmiut aalisakkanit tunisassianik piareerlugit suliarineqarsimasunik EU-mi niuerfinnut tunisaqartarnissaq pisariaqartikkaa. EU-mi niuerfiit angisoorujussuupput Savalimmiunullu pingaaruteqarlutik, nioqqutissiassat sulirineqarsimanngitsut kisimik EU-mi nunanut tunineqartarput, aalisakkanimmi tunisassiat piareerlugit suliarineqarsimasut 25 procentimik akitsuuserneqartarmata.

Sambandspartii sinnerlugu Folketingimi ilaasortap Edmund Joensenip tamanna akitsuutitigut nakutitsiniaanertut taavaa. Taassuma Venste sinnerlugu nunanut allanut tunngasutigut oqaaseqartartoq Michael Aastrup Jensen, Savalimmiut EU-mik pitsaanerusumik niueqatigiinnermi isumaqatigiissuteqarnissaanut Danmarki ikiuuttariaqartoq pillugu sapaatip akunnerata ataatsip matuma siorna allaqatigisimavaa. Edmund Joensenip tamnna ammaanersiorluni oqallinnermi aamma eqqaavaa.

Mette Frederiksenimit allakkat

Danmark Savalimmiunik tapersersuilluni ingerlatsereerpoq. Pappialanik takunnissinnaatitaaneq naapertorlugu takunnissimanerup takutippa, Savalimmiut Danmarkilu suliaq pillugu suleqatigiissimasut.

Ministeriunerup Mette Frederiksenip ammaanersiorluni oqallinnermi uppernarsarpaa, Ursula von der Leyen lagamanip allagaa ilanngullugu allaffigisimallugu.

- Danmarkip tungaanit Savalimmiut EU-llu attaveqatigiittarnerisa, ilaatigut niuernermut tunngasut eqqarsaatigalugit nutarterneqarnissaanik Savalimmiunit kissaatigineqartoq tapersersorneqartoq, Mette Frederiksen uppernarsaavoq.

EU-mut qaninnerorusunneq Rsulandimullu ungasinnerorusunneq
Edmund Joensenip Michael Aastrup Jensenillu oqaatigaat, Ruslandimut tunisaqartarnermut Savalimmiut ingalassimanerusariaqartoq, tassa Ruslandip niuerfimminik pinngitsuuisinnaannginneq Savalimmiunut kimigiiserutitut atorsinnaammagu.

Peqatigitillugu Folketingimi ilaasortat taakku marluullutik oqaatigaat, Savalimmiut isumannaallisaanermut politikkikkut akisussaaffimmik tigusisariaqartoq, Savalimmiunilu sakkutuut radareqarnissaannut akuersissuteqartoqartariaqartoq - aamma Savalimmiut EU-mik pitsaanerusumik isumaqatigiissuteqarnissaanut Danmarki ikiuuttariaqartoq.

Tamanna savalimmiuni politikkerinit iluarineqarpallaanngilaq. Nunanut allanut ataatsimiititaliami siulittaasoq Bill Justinussenip, Midterpartiet, Kringvarp Føroyamut oqaatigaa, Danmarkip Savalimmiut pitsaanerusumik isumaqatigiissuteqarnissaa qulakkeersinnaaguniuk, sooq tamanna qangali pisimannginnersoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER