Savalimmiormioq kalaallisumiit savalimmiormiusuumut aamma savalimmiormiusuumiit kalaallisuumut ordbogiliortoq
Savalimmiormiu Elin Neshamar kalaallisuumiit savalimmormiusuumut aamma savalimmiormiusuumiit kalaallisuumut ordbogiliorpoq. Oqaatsit taakku marluk pillugit aatsaavissuaq ordbogiliortoqarpoq
Atuakkanik naqiterisitsisarfik Sprotin ordboginik arlalinnik saqqummersitsereerpoq. Soorlu tuluttuummiit-savalimmiormiusut, danskisuumiit-savalimmiormiusut, aammali oqaatsit allat savalimmiormiunit misilittagarineqanngitsut savalimmiormiusuunngorlutik nutserneqarsimapput, soorlu russisuumiit-savalimmiorsmiusut aamma kiniiseriniit-savalimmiormiusut.
Maanna kalaallisuumiit-savalimmiormiusut ordbogi saqqummersinneqarpoq. Elin Neshamar Kalaallit nunaanni peroriartorsimasoq, kalaallisullu oqaatsini, atuakkiornermi tusagassiutilerinermilu bacheloritut ilinniagaqarsimasoq ordbogiliortuuvoq.
Sullinniakkat
Kalaallit Nunaanni Oqaasileriffiup kalaallisuumiit danskisuumut ordbogip atorneqarnissaa akuerisimavaa, Elin Neshamar taamaalilluni danskit oqaasiinik savalimmiormiusuunngortitsilluni nutserisimavoq.
- Imaassinnaavoq ordbogimik atuisussat amerlavallaanngitsut, ukiorpassuarnili Savalimmiut Kalaallillu unaat imminnut ataqatigiilluinnarsimapput. Kalaaleqarpoq Savalimmiuni najugaqartunik aamma savalimmiormioqarpoq Kalaallit Nunaanni najugaqartunik. Oqaatsinut taakkununnga marluusunut tamanna iluaqutaasinnaavoq, aamma immitsinnut ataqqeqatigiinnitsinnut pingaaruteqarsinnaavoq, Elin Neshamar Kringvarp Føroyamut oqarpoq.
Internetsikkut akeqanngitsoq
Ordbogi februaarip 21-ani Sprotin.fo aqqutigalugu saqqummiunneqassaaq, ordbogillu allat assigalugit kikkunnit tamanit pissarsiarineqarsinnaassaaq. Atornera akeqanngilaq.
Savalimmiuni kultureqarnermut ministeeriaqarfiup kommunillu peqatigiillutik ordbogit internetsikkut kikkunnit tamanit atorneqarsinnaasunngortillugit Sprotinimut neqeroorutigitissimavaat.
Sprotin suliffeqarfinnik arlalinnik aamma suleqateqarpoq, Elin Neshamarillu ilisimatitsissutigaa, Savalimmiuni suliffeqarfiup ataatsimip nutserineq akilersimagaa.
Savalimmiormiusuumiit kalaallisuumut ordbogiliorneq aallartinneqartoq
Elin Neshamarip suliassaq tulleq aallartereerpaa, tassalu savalimmiormiusuumiit kalaallisuumut ordbogiliorneq. Suliaq taanna kalaallisuumiit savalimmiormiusut nutserinermut sanilliullugu pisariunerussasoq naatsorsuutigaa.
- Neriuppunga suliap naammassiniarnera sivisuallaassaangitsoq, maannali saqqummersinneqartumut sanilliullugu sivisunerusumik taanna suliassaavoq. Ilinniarfioqaaq, oqaatsimmilli marluk taakku pillugit ilikkagaqaqaanga, aamma danskit oqaasii pillugit ilikkagaqarsimaqaanga, Elin Neshamar oqarpoq.
Maannakkorpiarli ordbogip siulliup saqqummersinneqarnera nuaannaarutigaa.
- Pissangasupilussuuvunga. Ordbogimik suliaqarnera uppernanngingajattutut misinnarpoq, maannali tassa saqqummiunneqarpoq, neriuutigaaralu inunnit tigulluarneqassasoq. Neriuppunga inuit iluaqutigiumaaraat. Tamanna isumalipilussuuvoq, Elin Neshamar Kringvarp Føroyamut oqarpoq.