Savaatillit ulluni 21-ni oqarasuaataat attaveqanngitsut
Kujataani savaatillit oqarasuaatitigut internetimullu attaveeruttuukulasarput, maannalu ilaasa Tusassimi attaveeruttoortarnerpassuatik ukiumi ataatsimi atuutereersut naammagilerpaat.
Qanisartuuni savaatillit ulluni 21-ni oqarasuaataat attaveqanngillat, internetiallu novembarimi ulluni arfinilinni attaveqanngilaq, ataasinngormallu novembarip 29-anni ulluni pingasuni attaveeruteqqippoq.
- Qaqortumut umiatsiamik angalaneq minutsinik 45-nik sivisussuseqartarpoq, sanilitsinnullu qaninnermut 5 kilometerinik ungasissuseqarpugut. Nalinginnaasumik mobiligut attaveqarneq ajorput, taamaammat arlaannik ilungersunartumik pisoqassappat oqarasuaat pisariaqartittorujussuuarput, Sara Lundgaard Jensen, Sermitsiaq.AG-mut oqarpoq.
Nunalerinermut Siunnersorteqarfik naapertorlugu, savaatillit 30-t missaanniittut internertimut oqarasuaammullu qaammataasakkut attaveqarput.
- Oqarasuaatit normuinik allattorsimaffeqarpugut, tassanilu savaaatillit 30-t missaanniittut qaammataasakkut attaveqarput. Normui 1992-imik aallartipput, taakkulu oqarasuaataat attaveeruttuukulasarput, Nunalerinermik Siunnersorteqarfimmi pisortaq, Hans Hansen, taama oqarpoq.
Attaveeruttoortarnerit savaatillit akornanni paarlakaallutik pisartut, Sara Lundgaard Jensen oqaluttuarpoq.
- Attavinikkaangatta allat aamma oqarasuaatiminni internetiminniluunniit attaveeruttarput. Pakatsinarpoq. Internet kigaareerpoq, attaveqaraangallu akiligassanillu akiliiniarluta pisussaaffinnullu allanut pisariaqartunut atortarparput. Kisianni qanoq sivisutigisumik attaveqassanersoq nalusarparput, savaatilik oqarpoq.
Sapilerneq misigigaat
Sara Lundgaard Jensen Tusassip Facebookianut tamanit takuneqarsinnaasumik allanniarluni aalajangersimavoq, Tusassip atuisunut kiffartuussivia aqqutigalugu ajornartorsiutit iluarsinissaannut tunngatillugu iliuuseqarsinnaanngitsutut misigisimagami.
- Ajornartorsiutit tunuinnarlugit nammineq tammarnissaat neriuutigiinnartarissi misigisimavunga. Maani Qanisartuuni maanna ulluni 15-ini sianersinnanngilagut, oqarasuaaterput attaveqanngimmat. Atuisunut sullissivimmut arlaleriarlunga pitsaasumik uterfigineqarnanga attaveqareerpunga. Kisianni savaatillit allat qaammatini arlalinni oqarasuaataat attaveqanngillat, arnaq savaatilik ilaatigut Tusassimut taama allappoq.
Savaatillit allat pakatsisut
Qanisartuuni savaatillit kisimik oqarasuaatiminnik internetiminnillu attaveeruttoornermik nalaataqanngillat. Saqqaani ilaqutariit aamma attaveeruttoortuarput.
- Ingammik meeraqarluni pakatsinarpoq. Arlaannimmi pisoqassappat ilaanni ernumassuteqartarpugut. Assersuutigalugu sapaatip-akunnerani kingullermi sialussuarpoq, aqqusernillu navianarsipput. Taamaammat ernumanarsinnaavoq, Asiarpa Motzfeldt Saqqaaneersoq, Sermitsiaq.AG-mut taama oqarpoq.
Asiarpa ilaquttanilu internetimut oqarasuaammullu sipaarniartorujussuupput. Internet e-mailimut ilaatigullu Facebookimut atorneqartarpoq. Meeraat angerlarsimaffimmi atuartinneqartut internetimik atueqqusaanngillat, ilaqutariillu internetikkut aallerneq ajorput aamma filminik isiginnaartanngillat.
- Qaammammut assigiinngitsunik akiliisarpugut. Pingaartumik qaammammut 1.500 koruunit missaannik akiliisarpugut. Kingullermik maalaaruteqarpunga, saniligut qaammatini arlalinni attaveqanngimmata. Savaatillit ilaatigut pakatseqqanermik nammineq attaviit iluarsiniartarpaat. Kisianni iluaqutaanngisaannarpoq, Asiarpa Motzfeldt oqarpoq.
Ilaanni mobilikkut attavininniarlutik qaqqamut ungasissumut majuartarlutik taanna oqaluttuarpoq.
Tusassip ajornartorsiut Sermitsiaq.AG-mut uppernarsarpaa.
- Atuisut aaqqiissuteqarfigineqarnissaminnut taama sivisutigisumik utaqqinerat Tusassip kukkussutigaa, taakkulu saaffiginnissutaat iluamik suliarineqannginnerat, Tusassi ilaatigut Sermitsiaq.AG-mut taama allappoq.