Savaatillit Peqatigiit siulittaasuat: Aatsitassarsiorfik qanoq kinguneqassava?
Kuannersuarni aatsitassarsiornerup kingunerisinnaasaanik misissuilluartoqarsimagaluartoq, Narsap eqqaani savaatillit eqqissiallassimanngillat. Taakku isumaqarput, aatsitassarsiorneq sumiiffimmi savaaqqanik tunisassiornermut nungutitsissasoq.
Sumiiffinnit arlalinnit oqaatigineqartarpoq, nunami maani aatsitassarsiornissat aallartisarneqartariaqartut, kujataanili savaatilinnut, savaaqqat ivigartorfigisartagaasa eqqaanni aatsitassanik qaqutigoortunik uranimillu piiaaniarluni aatsitassarsiorniarneq pitsaavallaanngilaq.
- Kalaallimmi Nunaanni uranitalimmik aatsitassarsiorneq misilittagaqarfigineqanngilaq, Savaatillit Peqatigiit Suleqatigiissut siulittaasuat Lars Nielsen Sermitsiaq.AG-mut oqarpoq.
- Kinguneqaatissai suunersut naluagut, taanna oqarpoq.
Siulittaasoq taamatut saqqummiivoq, ilaasortat siulersuisuunernut allagaqarlutik, Kuannersuarni aatsitassarsiorniarneq pillugu oqallinnermut peqataaqqusillutik piumasaqarnerisa kingorna.
Ilaasortat iliuuseqaqqusisut
Savaatillit Peqatigiit Suleqatigiissut ilaasortai Qaqortumi ukiumoortumik ataatsimiikkamik, uranitalinik piiaaniarnermut taasisimapput. Taasititsinerup takutippaa, ilaasortat amerlanersaat aatsitassanik qaqutigoortunik uranitalinnik piiaaniarnermut akerliusut, ilaasortat peqatigiiffiup siulersuisuunerannut allakkaminni ilisimatitsipput.
- Inuussutissarsiupput tammassanngippat oqaluttuaannanngussanngippallu, pilersaarutit ulorianartut killiliiffigisariaqarpavut, ilaasortanit oqaatigineqarpoq.
Ivikkat radiop qinngonerinik ulorianartunik akoqalernissaat annilaanngatigineqartoq
Savat ivigartorfigisartagaasa radiop qinngornerinik ulorianartunik akoqalersinnaanerat, savaatillit peqatigiiffianit annilaanngatigineqarpoq.
- Tunisassiornermi pujoraraat radiop qinngornerik akullit qanoq aqunneqarsinnaappat? Tamatumami savaaqqanik tunisassiornitsinnut qanoq sunniuteqarnissaa naluarput. Savaaqqanik tunisassiortarnerup halvtreds procentia Kuannersuit eqqaanni narsaatini pisarpoq, Lars Nielsen oqarpoq.
VVm pillugu nalunaarusiami oqaatigineqarpat, ivigartortarfiit aatsitassarsiorfimmut qanippallaassanngitsut, taava tamanna ajorluinanrtumik kingunerluuteqarsinnaavoq, taanna oqarpoq.
- Assersuutigalugu aatsitassarsiorfimmit 50 km-it iluanni savaaqqanik tunisassioqqusisoqanngippat, taava savaateqarfiit amerlanersaat tammavissapput, ukiunilu 100-ni ingerlatsisimaneq tammavissalluni, SPS-imi siulittaasoq Lars Nielsen naggasiivoq.