Savaatillit mamarluinnartunik sassaallersimasut
Inuussutissalerinermi ilinniarfik Inuili tallimanngornermi ualikkut soqutiginnittunut tamanut Narsami innuttaasut illuanni, STI-p atuarfikuani, savaaqqamik nerisassianik assigiinngitsunik ussiititsisimavoq.
Narsami, savaateqarnermik nunalerinermillu Kalaallit Nunaanni illoqarfiit pingaarnersaanni, aamma Neqi A/S-ip najugaqarfigisaani savaateqarnermik inuussutissarsiuteqarneq ilisimasaqarfigitilerniarlugu inuussutissarsiutillu taassuma pingaaruteqassusaa malunnartinniarlugu ukiut pingajussaa nerisassanik sassaallertoqarpoq.
Narsap Katersugaasivia savaateqarfiit inuillu pillugit assitoqqanik innuttaasut illuanni pingasunngormalli saqqummersitsivoq.
Arnaq ataaseq Qassiarsummi peroriartorsimasoq savaateqarfimmi inuunerup qanoq ittuunera pillugu sisamanngornermi unnukkut oqalugiarpoq.
Tallimanngornermi ualikkut savaaqqap neqaanik nerisassiat assigiinngitsut sassaalliutigineqarnerat ornigarneqarnerpaasimavoq. Sialleralutartot inuppassuit nerisassanik ussiiartorlutik takkussuussimapput.
Inuilimi ilinniartut tunngaviusumik ilinniakkaminnut atatillugu, Narsap Atuarfiani 9. klassimi atuaertunik ikiorteqarlutik nerisassiorsimapåput.
Sassaalliutigineqartut illinnarluinnartutut isikkoqartut mamarsaatigilluarneqarsimapput. Savaaqqamit suppaliat, savaaqqamit burgeriliat, savaaraq poorlugu uutaq (indbagt), savaaqqamit frikadelliliat naasunik nunatsinneersunik mamarsaasikkat, savaaraq uutaq nunatsinneersunik naatsialik tupaarnartalillu karrymk miseqqigaq, savaaraq kissappallaarnagu qajulerlugu siataq qajuusaligaanngitsumik miserartalik kiisalu savaaraq coutonimik kuannernillu gravadigaq.
Pitsaaliuinermik Kultureqarnermllu Ingerlatsivik Narsami Katersugaasivik peqatigalugu tamatumanna aaqqissuussisimavoq, aamma Neqi A/S, Brugseni inuussutissalerinermillu ilinniarfik Inuili aaqqissuussamut aningaasaliissuteqarsimapput.