Savaatillit aningaasanik ikiorserneqassapput

Kujataani nunaatillit aasaanerani panernerujussanik eqqornerlunneqarsimapput, tamannalu Sermitsiaq.AG-p allaaserisatigut arlalitsigut allaaserinikuuvaa.

Savaateqarfinni arlalinni ivikkanik naatitsineq ajalusuuvissimavoq, savaatillillu nerukkaatissanik Danmarkimit pisiniartariaqarsimapput.

Nunaatilinnulli aningaasaqarniarnermikkut eqqorneqarsimasunut nuannersumik nutaarsiassaqarpoq.

Ilai utertinneqassapput

Savaatillit immikkut nerukkaatisinissaannut tapiissuteqarnissamik Naalakkersuisut qinnuteqaataat Aningaasanut Ataatsimiititaliap akuersissutigaa.

Aalisarnermut, Piniarnermut Nunalerinermullu Naalakkersuisoqarfik pisinnaatinneqarpoq aningaasat atorneqartussat 75 procentiinik tapiissuteqarnissaminut, taavalu sinneruttut 25 procentit taarsigassarsiaritillugit erniallit ukiuni pingasuni taarsersugassanngorlugit - taarsersuineq 2016-imit aallartittussanngorlugu.

Aammattaarli piumasaqaateqartoq atuarneqarsinnaavoq:

– Ikiorsernqarissamut piumasaqaataavoq inuussutissarsiutip siuarsarnissaanut qinnuteqartup uumasuutini ikilisassanngikkai.

Siunnersuineq

Immikkut ittumik ikiorsiissuteqarnermut ilaavoq nunalerisut Nunalerinermut Siunnersuisoqarfimmit annertunerusumik siunnersorneqarsinnaasut. Tassannga paasitinneqarsinnaapput qaqugukkut imerterineq aallartissaneritsik.

Namminersorlutik Oqartussat ilanngullugu nalunaarutigaat savaateqarfiit amerlanerusut narsaatit imerternissaannut imerteriveqalissasut.