Savaateqarneq pitsaasumik ineriartorfiusoq

Savaatillit Peqatigiit Suleqatigiissut, SPS, nutaanik siulersuisortaaqqammerput. Savaateqarnermik nunalerinermillu inuussutissarsiuteqarneq pitsaasumik ineriartorfiusoq, siulittaasuujunnaartoq, Lars Nielsen oqarpoq.

Upernaap kissarlaarsimanera savanut piaqqiortunut savaaqqunillu pitsaasuusimavoq. Silaannarlu nillasunnerulerluni panernerulermat savanut nerukkaatissanik ivikkanik naatitsiniarneq eqqornerlunneqalaarpoq. Junillu naajortornerani sila kissarnerulerlunilu siallertalermat naatitsineq pitsaanerulerpoq. Assimi savaateqarfik Qassiarsuk takuneqarsinnaavoq.

Savaatillit Peqatigiit Suleqatigiissut, SPS, julip aallartilaarnerani Qaqortumi ataatsimeersuarmat, siulersuisunut taasisinnaasut 40-t missaanniittut peqataapput. Taakku saniatigut allat savaateqarfinnut attuumassuteqartut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, Inuit Ataqatigiit, Kommune Kujallermi borgmesteri Stine Egede, Inuit Ataqatigiit, kiisalu Inatsisartuni Aalisarnermut Piniarnermut Nunalerinermullu Ataatsimiititaliami ilaasortat peqataapput.

Aviisi Sermitsiaq taama allappoq.

Naallu savaateqarnermik inuussutissarsiuteqarneq ilaatigut suli aningaasatigut unammillernartoqaraluartoq, taamaattoq ataatsimut isigalugu savaateqarnermik nunalerinermillu inuussutissarsiorneq pitsaasumik ineriartorfiusoq, SPS-imi siulittaasuujunnaartoq, Lars Nielsen, oqarpoq. Taanna nulianilu Makka Nielsen Kangerluarsorujuk savaateqarfimmik ingerlataqarput.

Pitsaasumik ineriartortoqartoq

Kujataani savaateqarfiit 38-t missaanniipput, ataaserlu Nuup Kangerluaniilluni, taakkunanilu savat savaaqqallu katillugit 18.000-it missaanniipput. Savaateqarfinni savat savaaqqallu 250-it 800-llu akornanniikkajupput. Ukiut kingulliit ingerlanerini savaatillit arlaqartut nunaatiminnik annertusaasimasut, savallu erniortut amerliortorusaartut, Lars Nielsen oqarpoq. Maannakkuugallartumut savaatillit sisamat missaat kisimik annikitsuinnarmik nersussuaateqarnermik saniatigut ingerlataqarput, Kalaallillu Nunaanni nersussuaateqarnermik ingerlataqartut annerpaartaat Narsap eqqaaniippoq. Nersussuit katillugit 200-it missaanniipput, maannakkugallartumullu Neqi A/S-imut tunineqartartut ikittuinnaapput.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS