Savaaqqap neqaa siataq qanoq pissava?

Nunalerineq qanoq ingerlaqqissava ineriartussavalu? Inuussutissarsiummut pilersaarutitut missingiummi nutaami anguniagartuumilu tamatumunnga siunnersuutigineqartut arlalissuupput. Qularineqassanngilarli: Atuisartut savaaqqat neqaat nunatsinneersut mamarisorujussuuaat.

Nunatsinni savaatillit ilarpassui piffissami matumani qungujulanerulaarnissamut pissutissaqarput. Upernaaq panertorujussuaq aasamit sialoqarluartumit taarserneqarpoq. Taakkua ataatsimut katinnerisigut savaaqqat maajimi juunimilu atugarissaarsimapput, sulilu pingaarutilimmik, narsaatit nerukkaatissanut naatsitsiviit aasaanerani qaammatit nalinginnaasumik panerpallaartartut ingerlaneranni naajartornissaminnut atugassarissaarsimapput.

– Sumiiffinni arlalinni aatsaat taama annertutigisumik naatitsisoqarsimanera nalunaarutigineqarpoq. Savaatillit ilaat 50 procentit angullugit qaffariaatinik misigisaqarsimapput, Qaqortup kujataani Kangerluarsorujummi savaatilik, Lars Nielsen, oqarpoq.

Lars Nielsenip SPS – Savaatillit Peqatigiit Suleqatigiissut aamma siulittaasuuffigaa. Atuuffimminilu tassani ilaasortat sinnerlugit nuannaarpoq.

Savat ikinnerusut, inuit ikinnerusut

– Katersukkat ajunngimmata ukiuunerani nerukkaatissanik pilersuineq upernaap ilangaatsiarsuarnut sivitsorsinnaassagunarparput. Tamanna ataasiakkaat aningaasaqarnerannut soorunami pitsaasuuvoq, maluginiakkani tunngavigalugit oqarpoq.

Sammivimmilli pingaarnermit – piffissarlu sivisunerusoq eqqarsaatigalugu – isigalugu nunalerinermut ajornartorsiutit suli amerliartorput.

Tamanna piviusunit uppernarsarneqarpoq: Savaatillit ikiliartorput, savaateqarnerlu ukiualuit matuma siorna panernersuarmit ajorluinnartumik eqqugaavoq.

Kisianni unammilligassat maanna Kujataani nunalerineq pillugu periusissiassatut nutaamut missingiummi, AG-p qanimut misissorsimasaani, saqqummiunneqarput. Tassani 2030-p tungaanut inuussutissarsiummut tamarmiusumut suliniutissat pingaarnerit najoqqutassiissutigineqarput.

Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk:

Powered by Labrador CMS