Saudi-Arabiami saassussisoqarnerata kingorna uuliap kinertup akia qaffarujussuarpoq

Saudi-Arabiami uuliasiorfissuit marluk arfininngormat dronet atorlugit saassunneqarmata uuliap kinertut akisa ti procentit sinnerlugit qaffappoq.

Taamaalilluni aamma benziina akisunerulissaaq.

Uuliamimk kinertumik niueqatigiinneq danskit nalunaaqutaat malillugu unnuap qeqqanut aallartimmat akigitinneqartoq 15 procentit missaannik qaffappoq, taamak allappoq nutaarsiassaqartitsivik Reuters. Nalunaaquttap akunnerata ataatsip missaa qaangiummat, Nordsømi uuli nappartamut 13 procentimik qaffasinnerulaarluni 68 dollarsit sinnilaarlugit akeqalerpoq.

Naatsorsuutigineqareersimavoq saassussinerit kingunerannik akigititat qaffassasut.

- Tunisassiornerput piffissami qaninnermi malunnaatilimmik kinguariassaaq, tamannalu sapaatip akunnerata aallartinnerani akigititanut sunniuteqarsinnaavoq, sapaatiummat oqarpoq Nordeami cheføkonom Helge J. Pedersen.

Saassussinerit uuliamik kinertumik ullormut tunisassiortarnerput nappartanut 5,7 millioninut ikilisissinnaavaat, Saudi-Arabiami naalagaaffiup uulisiarofia Aramco sapaatiummat ilisimatitsivoq.

Nunap uuliamik tunisassiortarnerata affaanik tamanna naleqarpoq, taamalu nunarsuarmi ullormut uuliamik pilersuisarnerup seks procentingajaanik naleqarluni.

Aggustusip qaammataani Saudi-Arabia, nunarsuarmi uuliamik avammut niueruteqarnerpaagami ullormut nappartat 9,85 millionit tunisassiarisarpai. Amerikami tusagassiorfik CNBC taamatut allappoq.

USA-p præsidentiata Donald Trumpip sapaatiummat oqaatigisimavaa, nunap uuliatigut sillimmatai pisariaqassappat tuniniarneqarsinnaassasut.

Aalajangerpunga niuerfiit "pilersuilluarnissaat" attatiinnarniarlugu, tweetsikkut taama nalunaaruteqarpoq.

Yemenimi pikitsitsiniat Houthikkut Saudia-Arabiamit aquneeqartumik illuatungiliuttunit akiorneqartut dronet atorlugit saassussisimanerarput. Ukiuni kingullerni pikitsitsiniat Saudi-Arabiami uuliat aqqutaannik umiarsuarnillu uuliamik assartuisartunik arlaleriarlutik saassussisarsimapput.

USA-mili nunanut allanut ministerip, Mike Pompeop Iran saassussisimasutut pasillerpaa.

Amerikami naalakkersuisut, atomimut tunngatillugu 2018-imi upernaakkulli USA-p Iranimimik isumaqatigiissutaanik Trump atorunnaarsitsimmat, Iranip uuliamik avammut niueruteqartarnera kinguneartittalersimavaat.

Saudi-Arabiami aqutsisut saassussinermut kikkut akisussaasutut isiginerlugit suli nalunaaruteqanngillat.