Sarfaq Ittuk maajip aallaqqaataata tungaanut tulassimagallassaaq.

Nunatta iluani pisariaqanngitsumik angallannerup matoqqatikkallarnissaanik oqartussat nalunaaruteqarnerat malillugu, Sarfaq Ittuk kinguartitseqqippoq.

Naalakkersuisut siulittaasuat, Kim Kielsen (S), marlunngornermi tusagassiortunik katersortitsigami ilisimatitsivoq illoqarfiit nunaqarfittaalu, 2009-p siulianit kommuniusimasut, iluanni angallannerit kisimik ingerlanneqarsinnaassasut. Taama iliuuseqarsinnaaneq aprilip naanissaata tungaanut killilerneqarallarpoq. Illoqarfiit akornanni, kommuniusimasullu avataannut angalanerit peqqussutigineqanngillat.

- Sullitavut piffissami apriilip 30-ta tungaanut billetsisisimasut Arctic Umiaq Linemut mailikkut attaveqaqquneqarput, angalanissamik allanngortinnissaa akiliutilluunniit utertinnissaat pillugit, Sarfaq Ittuk tusagassiutinut nalunaarutimini ilisimatitsivoq.

Sarfaq Ittuk martsip 27-anili sinersulertussaagaluartoq, maajip aallaqqaataani sinersulissaaq.