Sarfaq Ittuk sikumit anillappoq
Ullaaq manna Sarfaq Ittuk sikumit anillalluni ingerlavoq.
Nutarterneqarpoq
Sarfaq Ittup sikumit ingerlaqqinnissani iluatsippaa. Arctic Umiaq Linep Facebookimi nalunaarutaani tamanna atuarneqarsinnaavoq.
- Nuannaarutigalugu nalunaarutigisinnaavarput Sarfaq Ittuk sikumiit anillassimammat maannalu Arsuup tungaanut ingerlaarluni. Naatsorsuutigaarput nal. 10:00 Arsummut tikinnissaa. Arsummiit aallarffissaa suli ilisimanngilarput ilaasussalli toqqaannaq attavigineqarumaarput, umiarsuaatileqatigiiffik allappoq.
Tamanna nuannaartitsisorujussuusoq, titartaasartoq Robert Holmene, umiarsuarmi sulisoq oqarpoq.
- Sikumit anillaqqammerpugut!! Ullut arfinillit qaangiuttullu!! Inuit ilaasut qiimmattarput!! Maanna avannamut Arsummut ingerlaarpugut, taanna allappoq.
Sikumit ingerlaqqinnissaq aatsaat sisamanngorpat pissasoq ippassaq ualikkut nalilerneqaraluarpoq. Kisianni umiarsuaq maanna angalaqqilerpoq, tamanna Robert Holmenep assimi ikkussaani takuneqarsinnaavoq.
Angalanissamut pilersaarut nutaaq naatsorsuutigaarput nal. 14:00 saqqummiussinnaassallugu.