Sarfaq Ittuk marlunngornermi Nuummiit aallarpoq
Sinersortaat Sarfaq Ittuk Nuummiit marlunngormat ullaakkut aallarpoq. Maannalu misissorneqarpoq, inunnik aallartinnatik Nuummi tunillatsissimasunik attaveqarsimasunik ilaasoqarnersoq.
Sarfaq Ittuk marlunngormat ullaakkut Nuummiit aallarmat, Nuummiit aallartoqartannginnissaanik suli aalajangiisoqarsimanngilaq. Nunatsinni nakorsaanerup Henrik L. Hansenip tamanna Sermitsiaq.AG-mut ilisimatitsissutigaa.
Taamaammat umiarsuaq illoqarfiit pingaarnersaannit ilaasoqarluni aallarsinnaatitaasimavoq.
Oqartussanit maannakkorpiaq tamaviaarluni paasiniarneqarpoq, kikkut umiarsuarmut ilaanersut aamma ilaasoqarpat aallartinnatik Nuummi tunillatsissimasunik peqataasoqartumik aaqqissuussanut peqataasimasunik qanoq iliortoqassanersoq
- Tamanna eqqumaffigilluinnarpartut susoqassappallu piaarnerpaamik iliuuseqassaagut, Henrik L. Hansen oqarpoq.
Nunatsinni nakorsaanerup suli oqaatigisinnaannginnerarpaa, umiarsuaq tunillatsissimasunik ilaasoqassappat Nuummut utertinneqassanersoq.
Umiarsuaq kujammukarpoq, pilersaarutillu malillugit ullumi nal. 16.30 Qeqertarsuatsiaanut tikissalluni.
Ilaasut ilisimatinneqarsimasut
Arctic Umiaq Linemi pisortap Aviâja Lyberth Lennertip Sermitsiaq.AG-mut ilisimatitsissutigaa, ilaasut 76-it Nuummiit umiarsuarmut ilaallutik aallasimasut allattorsimaffii politiinut nassiunneqarsimasut.
- Politiit Nuummiit ilaallutik aallarsimasut allattorsimaffii misissuiffigileruttorpaat, tassani qulakkeerniarlugu ilaasoqannginnersoq tunillatsissimasunut attaveqarsimasunik. Nal. 16.30 Qeqertarsuatsiaanut tikitsinnata paasisaqarsimanissarput naatsorsuutigaarput, taanna oqarpoq.
Pisortap oqaatigaa, ilaasut pisoq pillugu ilisimatinneqarsimasut, kaammattorneqarsimasullu allanut qanillinaveersaarnissamut aamma eqqiluisaarnissaq pillugu inassuteqaatinik tamanik malinninnissamut.
- Nuummi tunillatsissimasunik attaveqarsimasunik ilaasoqassappat umiarsuarmi upalungaarsimasoqarpoq, taakku qanoq iliuuseqarnissatsinnik nunatsinni nakorsaanerup ilitsersuutaanik tigusaqarnissatta tungaanut umiarsuarmi mattusimatinneqassapput, Aviâja Lyberth Lennert oqarpoq.