Sarfaq Ittuk Arsummut tulassinnaanngilaq
Arsummi talittarfik anorersuarmit ajoquserneqarsimavoq, taamaammat Sarfaq Ittuk illersorneqarsinnaasumik tulassinnaanngilaq
Sarfaq Ittuk sapaatip akunnerani matumani Arsummut tulassinnaanngilaq. Arctic Umiaq Line tusagassiorfinnut nalunaaruteqarnermini taamatut allappoq. Talittarfiup ajoqusersimanera tamatumunnga pissutaavoq.
- Piffissami kingullermi anorersuartarnerata malitsigisaanik talittarfik ajoraluartumik ajoqusersimavoq, isumannaallisaaneq eqqarsaatigalugu inuttanut ilaasunullu illersorneqarsinnaanngitsumik. Taamaammat Arctic Umiaq Line aalajangersimavoq, talittarfik iluarsaanneqartinnagu Arsummut tulattarniarani, Arctic Umiaq Line tusagassiorfinnut nalunaaruteqarnermini allappoq.
- Pisoq pillugu Pilersuisoq kiisalu Ineqarnermut Attaveqaatinullu Naalakkersuisoqarfik oqaloqatigaavut, isumannaallisaanermut akorngutaanngitsumik Arsummut tulaqqittalernissaq aaqqiissutissarsiorlugu sulisoqarpoq.
Arctic Umiaq Line sullitat pisumit eqqorneqartut attavigineqarsimapput, nutaarsiassaqalerpallu nalunaaruteqarniarlutik.