Sarap tunuarnerani utaqqimaartut

Sara Olsvigip tunuarnerminik nalunaaruteqarluni ataasinngornermi tusagassiortunik katersortitsinerani, siulittaasumut tullersortaasut marluk Múte B. Egede (aaqqissuussaanermut) aamma Aqqaluaq B. Egede (naalakkersuinikkut) partiip qaaqqusineratigut immikkut ittumik ataatsimeersuartoqalerpat siulittaasutut qinigassanngortinniarnerlutik erseqqissumik paatsuugassanngitsumik oqaatiginngilaat.

Mùte aamma Aqqaluaq assigiipajaamik tutsuiginanngitsumik tusagassiortunik katersortitsinermi ima oqarput:

Siulersuisuunerit paasitinneqartut

- Maanna immikkut ittumik ataatsimeersuartitsinissaq piareersarlugu aallartissaagut. Tunuliaquttallu kikkut siulittaasutut piukkunnarnersut naliliinissaminnut periarfissinneqassapput. Kikkummi tamarmik qinigassanngortissinnaapput, taakku assigiingajammik taama oqarput, partiimilu siulittaasunngorusunnerlutik oqaatigerusunngilaat.

IA-mi siulersuisuunerit ippassaq sapaammi aalajangerneq pillugu paasitinneqarput. Sara Olsvig ingerlaannaq atuuutilersumik tunuarpoq, Aqqaluaq B. Egedelu ukiaani ataatsimiinneq naammassippat immikkut ittumik ataatsimeersuartoqarnissaata tungaanut siulittaasuugallassaaq.

Inatsisartuni sinniisaa

Sara Olsvigip Inatsisartuni ilaasortaaffimminit novembarip tallimaanni tunuassaaq. Aqqa Samuelsen sinniisuni siulliuvoq, taamaammallu Inatsisartuni inissaqalissaaq. Taanna Qasigiannguaneersuuvoq.

Sara Olsvig ukiuni sisamani siulittaasuuvoq, tassanilu Kuupik Kleist paarlakkamiuk partiimi kinguaariit nikinneranni malunnaateqarpoq.

OBS: Allaaserisami siullermi Sara Olsvig ukiuni arfineq-marlunni siulittaasuusimasoq atuarneqarsinnaavoq. Maanna ukiut sismanngorlugu iluarsineqarpoq. Kukkuneq aaqqissuisoqarfiup utoqqatsissutigaa.