Sarap oqalugiarnera kingulleq
Sara Olsvig naggataasumik Inatsisartut oqaluttarfianni ullumi oqalugiarpoq. Tassani meeqqat pillugit nuna tamakkerlugu iliuusissatut pilersaarusiortoqarnissaa siunnersuutigaa.
Inuit Ataqatigiit siulittaasorisimasaat Sara Olsvig Inatsisartunit tamaatullu politikkimit ataasinngorpat tunuassaaq.
Inatsisartullu oqaluttarfiani naggataasumik ullumi oqalugiarpoq, tassani kingusinnerpaamik ukiakkut ataatsimiinnermi 2019-imi meeqqat inuusuttullu pillugit nuna tamakkerlugu Naalakkersuisut iliuusissatut pilersaarusiornissaannik peqquneqarnissaat siunnersuutigalugu, taamaaliornikkut meeqqat inuusuttullu sumiginnarneqarsimasut ikilisinneqarnissaat anguniarneqassalluni.
- Siunnersuut una naggataarutigissagakku nuannaarutigaara, Sara Olsvig naatsumik nalunaaruteqarnermini taama allappoq.
Meeqqat Illersuisuata Aviâja Egede Lyngep taama ittumik pilersaarusiortoqarnissaa arlaleriarluni ujartortarsimavaa.
- Ukiorpaalunngortuni Naalakkersuisuni nikerartuni meeqqat inuusuttullu annertuumik sammivavut. Tamanna pitsaavoq nangittariaqarlunilu. Sulili pitsaanerusumik ingerlassinnaavarput, Sara Olsvig oqalugiarnermini oqarpoq.
- Kisitsisit paatsuugassaanngilluinnarput. Naalakkersuisut 2017-imi meeqqanut inuussuttunullu susassaqarfinni suliat amerlassusaat pillugit nassuiaat naapertorlugu kommunini sulianik ingerlatsisuni ataasiakkaani suliassat amerlavallaarujussuartut suli uninngaannarput, meeqqalli amerlasoorpassuit suli angajoqqaaminnik sumiginnarneqarnerannik kisitsisit suli aarlerinarnerupput.
Siunnersuutigineqartoq Inatsisartunit taperserneqarluarpoq.
Peqqissutsimut isumaginninnermullu naalakkersuisunngorlaap, Martha Abelsenip (S), siunnersuut tigulluarpaa.
- Iliuusissatut pilersaarummik taama ittumik suliaqarnissamik isumaqatigiittoqartoq qiimmaallaatigivara, naggataarutaasumik oqaaseqaatimini oqarpoq.
- Suliassannik aallartinnissannut kajumitsitsilerpoq.
Iliuusissatut pilersaarusiornermi naalakkersuisoqarfiit ataasiakkaat kisimik suliaqassanngitsut Sara Olsvigiup (IA) oqalugiarnermini erseqqissarpaa.
- Isumaginninnikkut aarlerinartorsiortut meeqqallu sumiginnakkat pillugit pinaveersaartitsinermi iluatsitsinissatsinni nuna tamakkerlugu iliuusissatut pilersaarut, Naalakkersuisut tamarmik suleqatigiillutik naalakkersuisoqarfiillu tamaviisa suleqatigalugit ataqatigiissaarillutillutillu suliaqarnissaat pingaarutilerujussuuvoq. Tamatumanittaarlu susassaqarfiit akimorlutik sulianik aaqqissuussinissaat pingaaruteqarluinnarpoq. Tamannalu nuna tamakkerlugu pilersaaruteqarnerup qulakkiissavaa.
Naggataarutaasumik oqaaseqarnermini Sara Olsvig pisut pillugit attortissimalluni oqaaseqarpoq.
Inatsisartut oqaluttarfianni sammisaq taannarpiaq pillugu naggataasumik saqqummiisinnaagami nuannaarutigalugu oqaaseqaqqippoq. Inatsisartunilu amerlanerussuteqartut isumaqatigiissinnaammata nuannaarutigaa.
Pisarninilu malillugu, suleqatigiunnaalikkani pitsaaliuinermik suliaqarneruleqqullugit piumaffigai, suliaqartullu akimorlugit meeqqat pillugit politikkiliornissamik kaammattuilluni.
Aalajangiiffigisassatut siunnersuutip siullermeerneqarnerani partiinit tamarmiusunit taperserneqarpoq.