qinersineq
Sarap Kim maniguutiinnarfiginianngilaa
IA-mi siulittaasoq AG-mi sapaatip-akunnerani apeqqarissaarfigineqarpoq. Taassuma siusinaarluni Siumut naalakkersuisoqatigeqqissamaarnerlugu neriorsuinianngilaq
Inuit Ataqatigiit qinersinerup kingorna kikkut naalakkersuisoqatigerusunnerlugit oqaluttuarerusunngilaat. Tamanna AG-mi sapaatip-akunnerani apeqqarissaarnermi atuarneqarsinnaavoq.
- Naalakkersuisooqatigiilernermi IA akisussaaffimmik annertuumik tigusivoq. Akisussaaffiup taassuma ingerlateqqinnissaanut piareersimavugut. Suliatsinnut qinersisartut qanoq oqassanersut pissanngatigaarput. Nammineq isumaqarpugut partiitut naalakkersuisooqataasutut anguniakkavut anguniarlugit ilungersorsinnaasugut uppernarsarsimagipput, Sara Olsvig AG-mut oqarpoq.
Akissutit ima isumaqarpa IA Siumumik nalaakkersuisooqateqaannarniartoq?
- Taamatut oqanngilanga. Itigartitsinangalu neriorsuerusunngilanga. Qinersinerup kingorna kikkut suleqatigissanerivut arlallit tunngaviusinnaapput. Uivernersuaqareernerata kingorna nunap aqunneqarnerata patajaatsumik ingerlanissaa kissaatigaarput. Isumaqarpugullu ukiup aappaata affaani kingullerni aqutsinerup ersarissumut ingerlatinnera qulakkeeriffigeqataasimagipput.
Sara Olsvigip apersorneqarnera tamaat AG-mi saqqummertumi kingullermi atuarsinnaavat. Tassani aamma namminiilivinneq pillugu qanoq isumaqarnini oqaluttuaraa, kiisalu anaanatut milutsitsilluni qaffasissumik naalakkersuinikkut suliaqarneq qanoq atorneraa.