Sara Olsvig: Nalunaarusiaq pingaarutilik qisuariarfigineqanngilaq

Nunami maanni ilinniartitaaneq meeqqallu atuarfiinik isumaginnittarneq oqallisaajuarsimavoq. Nalunaarusiaq alla ilinniartitaanermik aaqqissuusseqqinnissamut aqqutissiuisussaq Namminersorlutik Oqartussat 2020-p aallartinnerani suliaralugu naammassisimavaat .

Nalunaarusiaq inunnit arfinilinnit suliniummullu aqutsisumit ataatsimit suliarineqarsimavoq, ilaatigullu politikkerinut atorfilittanulllu inassuteqaatinik imaqarluni.

Nalunaarusiaq saqqummiunneqarmalli ilinniartitaanerup aaqqissuuteqqinneqarnissaa innuttaasunit tusarfigineqarsimanngilaq, Kalaallit Nunaanni Sulisitsisut ilaatigut taamanikkut Naalakkersuisuusut arriippallaamik suliaqarsimanerat isornartorsiorsimavaat.

Kalaallit Nunaanni Inuit Pisinnaatitaaffiinut Siunnersuisoqatigiit meeqqat inuusuttullu ilinniartitaaneranni killiffik pillugu nalunaarusiaq apriilip qaammataani saqqummiuppaat. Tamatumalu kingorna Siunnersuisoqatigiit politikkerinit tusagaqarsimanngillat.

- Maannakkorpiaq allakkatigut qisuariartoqarsimanngilaq imaluunniit politikkerinit tusagassiorfitsigut qisuariartoqarsimanani, Kalaallit Nunaanni Inuit Pisinnaatitaaffiinut Siunnersuisoqatigiinni siulittaasoq Sara Olsvig Sermitsiaq.AG-mut oqarpoq.

Nalunaarusiami ilaatigut saqqummiunneqarpoq, immikkut ittumik atuartitsinermi ilinniartitsisutut ilinniarsimasunik annertuumik amigaateqartoqartoq, aamma nunaqarfinni ilinniartitsisut 48 procentii ilinniarsimasuunngitsut. Illoqarfinnili ilinniartitsisut 91 procentii ilinniartitsisutut ilinniagaqarsimasuusut.

- Tamanna ernumanartuuvoq, taamaammat politikkerinut pineqartut pillugit inassuteqaateqarluta allagaqarsimavugut, Sara Olsvig oqarpoq.

Inassuteqaatit tigussaasut atuutsileriaannaasullu

Siunnersuisoqatigiit Katuami Ilinniartitaanermut Naalakkersuisuusimasumit aamma Meeqqanut Inuusuttunullu Naalakkersuisuusimasumit peqataaffigineqartumik unammilligassat pillugit saqqummiussinissamut periarfissaqarsimapput. Kisiani taamanikkulli pisortanit qisuariartoqarsimanngilaq.

Siunnersuisoqatigiinnilli maluginiarneqarsimavoq, inuit naqinnernik ilisarinnissinnaanngitsut kalaallisut misilitsinneqarnissaat pillugu oqallittoqarsimasoq. Sara Olsvigip erseqqissaassutigaa, nalunaarusiaq politikkerit ilinniartitaanerup pitsaanerusumik qulakkeerneqarnissaanut sakkutut pingaarutilittut atorsinnaagaat.

- Ilinniartitaanermi suliniutissat pingaarutillit ilagigaat inuppassuarnit oqaatigineqartarpoq. Nalunaarusiarput aqqutigalugu ilinniartitaaneq inuit pisinnaatitaaffiinut tapertaasinnaavoq, Sara Olsvig oqarpoq, nangillunilu:

- Soournami politikkerit nalunaarusiatsinnik atuartarnissaat neriuutigiuaannarparput. Institut for Menneskerettighederilu peqatigalugu anguniartuartarparput, nalunaarusiatta tigussaasuullutillu atuutsileriaannaasarnissaat. Tassa atorneqarsinnaasunik inassuteqaateqartarpugut.

Naalakkersuisunut inassuteqaatit ilaatigut tassaapput:

• Naalakkersuisut kommunit peqatigalugit ilinniartitsisunngorlaat nunaqarfinni inukinnerusuni ilinniartitsisoorusussusermik qaffassaasunik ataannartitsisuusunillu iliuuseqassasut, soorlu nunaqarfinni illoqarfinnilu suleqatigiinnernik paarlaasseqatigiittarnernilluunniit pilersitsinikkut.
• Naalakkersuisut kommunit peqatigalugit speciallærerit ilinniagaasa aamma piginnaasaasa qaffasissusaannik malunnartumik pitsanngorsaaneq qulakkiissagaat.
• Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik ilinniartitaaneq pillugu periusissiap tulliuttup suliarineranut atatillugu inuit pisinnaatitaaffii -meeqqat pisinnaatitaaffii ilanngullugit-, innarluuteqarneq, inuiaassuseq aamma oqaatsinik sorlernik atuineq apeqqutaatinnagu immikkoortitsinnginnissaq naligiimmik periarfissaqarnissaq tamani ukkatarineqassasoq.
• Ilageeqarnermut Naalakkersuisoqarfik inuusuttut ilinniarfiini ilinniagaqartut inuuniarnikkut atugarisaannik misissuinernik ingerlatsisalissasoq saqqummiussisalissasorlu, soorlu aamma atuarunnaarnerit patsisigisaat misissorneqassasut malitsigisaanillu ilinniagaqartut inuunerisaanik pitsanngorsaataasussanik tulluuttunik naleraqartunillu malitseqartitsissasoq.