Sara Olsvigip Kim Kielsen unammillernissaanut piareersimasoq

Inuit Ataqatigiit Naalakkersuisuni siulittaasuutitaqarnissaq anguniarpaat, 'qinersisartut kissaatigissappassuk'

2016-imi ukiakkuææo naalakkersuisoqatigiipput, ippassaq nalunaaqutaq 16:30 unammilleqatigiilereput: Kim Kielsen aamma Olsvig. 2015-imi qinersisoqarnerani taasinerit 325-iinnaat Siumup aamma Inuit Ataqatigiit nikingassutigaat.

- Qinersisartut piumassusaasa Naalakkersuisut qanoq isikkoqarumaarnissaannut aalajangiisuussapput. Kisianni akisussaaffimmik tigusinissatsinnut piareersimalluta takutereerparput, naalakkersuisutullu ajukkunnarata, IA-mi siulittaasoq Sara Olsvig Sermitsiaq.AG-mut oqarpoq.

- Sara Olsvig, Naalakkersuisunut siulittaasunngornissat anguniarpiuk?

- Oqareernittut akisussaaffimmik tigusinissamut piareersimavugut, tassanilu aamma akisussaaffiit annersaat pineqarpoq. Qinersisartut kissaatigippassuk, suliap tamatuma kivinnissaanut piareersimavugut.

Periarfissat tamaasa ammatikkai
Partii annersaasoq siullilluni naalakkersuisoqatigiinnik katersuutsitseriarnissamik periarfissaqartinneqartarnera ileqquuvoq. IA annersaassappat, Sara Olsvigip naalakkersuisoqatigiinnissamut periarfissat tamaasa ammatippai.

- Partiit tamaasa isumaqatiginninniarfiginissaannut piareersimavugut, taanna oqarpoq.

IA-p piffissami 2009-mit 2013-imut maannamut Naalakkersuisunut siulittaasuutitaqarfigisatuaraat, partiip tassani Demokraatit aamma Kattusseqatigiit Partiiat naalakkersuisoqatigaat.

Siumup iluminni ajornartorsiornera pissutaatikkaa
Naak qinigaaffik naammassinngitsoq Kim Kielsen qinersisoqarnissaanik nalunaaruteqaraluartoq, IA qineqqusaarnissamut piareersimasoq, Sara Olsvigip oqaatigaa.

- Piareersimavugut. Upernaakkut ataatsimiinneq pingaarutilinnik suliassarpassuarnik imaqartoq naammassissallugu neriuutigisimagaluarparput, taanna oqarpoq.

- Siumumi eqqissiviilliortoqangaatsiarnikuuvoq, taamaammat piffissami matumani qinersisoqarnissaanut piareersimanikuuvugut.

- Aamma aasaq Siumumi siulittaasunngorniuttoqarneranut atatillugu qinersinissamik nalunaaruteqartoqarnissaanut piareersimanikuuvugut, taanna oqarpoq.

Powered by Labrador CMS