Sara Olsvigip eqqunngitsunik paasissutissiisoqartarneq ernumassutigaa

Inuit attaveqaqatigiittarfiisigut corona, killilersuutit akiuussutissalersuinerlu pillugit oqallittoqaqaaq. Inuit Pisinnaatitaaffiit pillugit Siunnersuisoqatigiit siulittaasuata Sara Olsvigip internetsikkut eqqunngitsunik paasissutissiisoqartarneq ernumassutigaa.

Tuniluuttoqalersinnaanera pinngitsoortinniarlugu WHO-p inassuteqaatai eqqarsaatigissagaanni, Nunatsinni akiuussutissalerneqarsimasut ikippallaarput. Taamaammat Nunatsinni Inuit Pisinnaatitaaffii pillugit Siunnersuisoqatigiinni siulittaasup Sara Olsvigip akiuussutissalertissimanermut uppernarsaateqarnissamut malittarisassat nutaat ajunnginnerarpai.

Sara Olsvigi oqarpoq, akiuussutissalersuineq inuit attaveqaqatigiittarfiisigut oqallisigineqarnerusariaqartut, inuillu attaveqaqatigiittarfiini susoqarnersoq ukkatarineqarnerulissasoq isumaqarluni - eqqunngitsunimmi paasissutissiisartut amerlalluinnarmata:

- Inuit pisinnaatitaaffii eqqarsaatigissagaanni, pinngitsaaliissummik akiuussutissalersuisoqalersinnaanera kissaatiginanngilaq. Nammineq kiffaanngissuseqarneq tunngavigalugu akiuussutissalerneqarnissaq pingaaruteqarluinnartuuvoq, taanna oqarpoq.

Eqqunngitsunik paasissutissiissarneq nakkutigineqarnerulissasoq

Pinngitsaaliissuteqartarnerli kisimi inuit pisinnaatitaaffiinut ajoqusiisanngilaq, siulittaasoq oqarpoq.

- Inuit pisinnaatitaaffii eqqarsaatigalugit, paasissutissat eqqunngitsut amerlavallaartarneri unammillernartoqarsinnaavoq, isumaqarpungalu nunarsuarmi tuniluuuttoqarneranit eqqunngitsunik paasissutissiisarneq inuit pisinnaatitaaffiinut atatillugit suliarineqartassasut.

Innuttaasunummi eqqunngitsunik paasissutissiisimanerit kingunerluuteqartut takuneqartareerpoq maannalu kingunerluuteqarsinnaalluni.

- Naggataatigut inuunermut peqqissutsimullu ajoqutaasumik kinguneqarsinnaavoq, eqqunngitsunillu paasissutissiisoqartarnera ilungersunartuuvoq, Sara Olsvig oqarpoq.

Powered by Labrador CMS