Sara Olsvig tunuarpoq

Sara Olsvig Inuit Ataqatigiinni siulittaasutut tunuarpoq, politikkimiillu tunuarluni. Taanna ullumi nalunaaqutaq ataatsimut tusagassiortunik katersortitsinermi nalunaarutigaa. Partiit akornanni politikkikkut silaannaq iluanngitsoq tamatumunnga tunuliaqutaanerarpaa.

- Piffissami sivisuumi aalajangeriartuaarneq pivoq. Maanna politikkikkut sulinermi silaannaq uannut tulluanngissiartornera ersarissiartuinnarsimavoq, Sara Olsvig Sermitsiaq.AG-mut oqarpoq.

- Taamaattoqarnera politikikkut sulinermut kigaallisaasuullunilu akornusersuisuuvoq.

Nammineq partiimini pisut aalajangerneranut tunngassuteqanngitsut, taassuma naqissuserpaa.

- Inuit Ataqatigiit partiiuvoq nukittooq angisoorlu, nukiillu pitsaasut ingerlatitseqqinnissamut piareeqqapput, taanna tusagassiuutinut nalunaarummi allappoq.

Pissaaneqarniunnerit

Politikkikkut sulinerup ingerlanneqarnera illersorsinnaajunnaarlugu, taanna isumaqarpoq.

- Uannut inuttut suliat ingerlassama inuttut innarligassaannginnermik, tutsuiginartumik pimoorussisumillu toqqammaveqarnissaat suleriaatsinni pingaartuuvoq. Tamannalu piffissami kingullermi naammassiuminaassiartuinnarsimavoq. Nunatsinni politikimik ingerlatsineq ”akersuunnersuarmik” anersaaqarluni, pissaaneqarniulluni pissaaneqarussutsimillu nittarsaassiniarnermik imaqarpallaarpoq. Paasinnittaasera naapertorlugu tamat oqartussaaqataaneranni ikinnerussuteqartut aamma inissaqartinneqartariaqarput, minnerunngitsumillu oqaloqatigiinneq naalaarsinnaassuseq pingaaruteqarpoq. Tamanna inatsisartoqarnerup isumagimmagu.

- Oqaloqatigiinneq, piviusorsiorneq peqqissaarnerlu aallaavigalugit sulineq pingaaruteqarpoq – ullumikkulli sulianik ingerlatsinitsinni amigaataavallaarujussualersimapput, tamannalu inooqataaffigisinnaajunnaarpara. Inuttut killiliinissara anguara.

- Mittarfiliortiterniarneq pillugu inatsisissatut suliaq pereersimasut allat ilanngullugit uannut massakkut aalajangertariaqalersitsivoq. Inatsisissami pingaaruteqaqisumi tassannga sulinitsinni itisiliisumik isorinnittunillu apeqquteqartugut sulinermik kigaallisaasutut apersorpallaartutullu pisuutinniarneqarnermik imaqarpallaarpoq. Tamannalu kingullermik amerikamiut Ilulissat mittarfissaannut aningasaliisinnaanerat pillugu siunersiuiumanermik kissaateqarnitta amerlanerussuteqartunit itigartinneqarneratigut pivoq. Suliaq taanna politikikkut isummersornerit oqallinnerillu sukumiisut ataatsimiititaliat ataatsimiinneranni, partiit akornanni kiisalu Naalakkersuisut Inatsisartullu akornanni pisariaqarnerat illikartillugu partiilersornernik pissaaneqarniunnernillu taarserneqarsimanerannut assersuutissaavoq.

- Taamatut suleriaaseqarneq illersorsinnaanngilara, ullumikkullu periutsit qanoq innerini ikinnerussuteqartugut siunnerfigissaanngitsumik suleriaatsimut pinngitsaalisatullusooq peqataatinneqarpugut, taamaalillutalu Inatsisartut sulineranni sulianik pitsaanerpaajunngitsumik ingerlatsinermut akisussaaqataalersinneqarluta.

- Kalaallit Nunaat politikikkut eqeersarneqartariaqalerpoq.

Taamatut alloriarnini politikkikkut inuunermi uisitsisutut isigalugu, nangilluni allappoq.

- Neriuppunga partiit Inatsisartunilu ilaasortat tamarmik tamat oqartussaaqataanerannik illersuinerulissasut. Inuit qinigaattut innuttaasut sinnerlugit Inatsisartuunissatsinnut qinigaavugut, suleriaaserpullu innarlerneqaraangat, innuttaasunit suliakkiussamut ataqqinninnermik annaasaqarsimasugut misigisimalersarpara. Tamanna uatsinnut inuttut ataasiakkaatut minnerunngitsumillu inuiaqatigiinnut tamarmiusunut peqqinnartuunngilaq.

Akisuallaartoq

Aalajangernermini aamma nammineq inuunerminut tunngassuteqartoq nassuiarpaa. Sara Olsvig suliariteqqammerpoq, napparsimaneralu annertunngikkaluartoq uisitsivoq.

- Inuttut piffissaq kingulleq nappaammik eqqugaaffigisara pilatsinnermik nassataqartoq uannut sakkortusimavoq. Politikkimilu silaannaq pitsaanngitsoq suliffigisarput uannut inuttut akisuallaalerpoq. Meeqqannut, aappannut ilaquttannut ikinngutinnullu piffissaqarnerorusuppunga.

- Tamatumalu suliffigisamma suliffittut najussallugu uannut kajuminnarunnaarnera kinguneraa. Timikkut, inuttut tarnikkulluunniit. Sivitsorsaallunga qinigaaffiup sinneranut ataatsimiinnerulluunniit naanissaata tungaanut ataniaannarnanga, politikimi sulinera tamaanga killeqartariaqartoq nassuerutigisariaqarsimavara. Ataniaannarneq uannut inuttut partiinnulluunniit pitsaasuunavianngilaq.

- Parteera inuillu uannut Inuit Ataqatigiinnullu tatiginninnermik takutitsisut tamaasa qujaffigerusuppakka, taamatullu inuiaqatigiit ukiunut arfineq marlunnit uannut pissanganarsimaqisunut qujaffigiumavakka. Ataatsimoorluta pitsaasorpassuarnik angusaqarpugut. Politikimi sulininni sulinera ullullu tamaasa tunniusimaffigisakka tulluusimaarutigaakka. Tamanna anguniartuarsimavara, anguniagarlu tamanna aalajangiusimasimavara. Inuillu politikimik tunuarninni pakatsisitakka tamatta qanigisatsinnut uatsinnullu namminermut ataqqinassutsitsinnullu paasinninnissaannik qinnuigiumavakka. Aalajangernerit ilaat ima ajornakusoortigisarput, allaat tamatsinnut ugguarnermik pakatsinermillu imaqartarlutik. Aalajangernerali uannut eqqortuusoq nalunngilara oqiliallaatigerujussuarparalu.

Sara Olsigip politikkip avataani inuuneq qanoq atussanerlugu suli aalajanginngilaa.

- Qujanaq tatiginninnermik takutitsinissinnut. Maniguullunga nunatsinnik sullissisimanera ataqqinaatitut isigivara.