Tassaarsuarmit eqqugaasut
Sara Olsvig tassaarsuarmit eqqugaasimasut oqaloqatiginissaannut aggersaavoq
Naalakkersuisoq Sara Olsvig (IA) ukioq kingulleq pinngortitarsuarmi ajunaarnermit eqqugaasut Uummannami oqaloqatiginissaannut aggersaavoq
Isumaginninnermut, Ilaqutariinnermut, Naligiissitaanermut Inatsisinillu Atuutitsinermut Naalakkersuisoq, Sara Olsvig (IA), Illorsuarmi Nuugaatsiamilu innuttaasut pinngortitami ajunaarnersuarmit eqqugaasimasut, sapaatip akunnerata tulliani Uummannami oqaloqatigissavai.
- Nuugaatsiarmiut Illorsuarmiullu qanimut naapillugit isumaginninnikkut suliniutit tapersersuinerillu qanoq misigisaqarfigisimaneraat tusagaqarfigissallugu pingaartippara, Sara Olsvig (IA) oqarpoq.
Isumaginninnikkut suliniut ingerlaannassasut
Ukioq kingulleq ulloq 17. juni Nuugaatsiami pinngortitami ajunarnersuaqarnerata kingorna, Sara Olsvigip naalakkersuisoqarfia tassaarsuarmit eqqugaasut suliniuteqarfigisimavai. Tassani Naalakkersuisut Isumaginninnermut Aqutsisoqarfik aqqutigalugu kommunip Nuugaatsiarmiunut Illorsuarmiunullu isumaginninnikkut suliniutaanut tapersersuipput. Isumaginninnikkut suliniutit 2018-mi nanginneqassapput.
- Ajunaarnersuaqarnerup innuttaasut atugaannut mumisitsisimanissaa qularnanngilaq piffissamilu aggersumi suliniuteqarnitta nanginnerani suut eqqumaffigissanerlugit toqqaannartumik paasisaqarfigerusuppara, Sara Olsvig (IA) oqarpoq.
Oqaloqatiginninneq Isumaginninnermut Aqutsisoqarfimmit aallartitanit Avannaatalu Kommunianit peqataaffigineqartussaq Uummannami Atuarfik Edvard Krusep inersuaani pissaaq marlunngorneq februaarip 13-ni nal. 16-mit 18 tungaanut.
Sara Olsvigip naalakkersuisoqarfi naapertorlugu, Nuugaatsiami Illorsuarmilu qimagussorneqarsimasut amerlanersaat ullumikkut Uummannami najugaqarmata oqaloqatiginninneq Uummannami ingerlanneqassaaq.
Aamma atuaruk: Tassaarsuarmit eqqugaasut 26-t suli inissarsineqanngillat