Folketingimut qinersineq
Sara Olsvig qinersinermik naliliivoq Innuttaasut politikeriluarnermik annertuumik ajornartorsiuteqarput
- Qinersinermut peqataasut 50 procentit ataallugit amerlassuseqarnerisigut tamat oqartussaaqataaneranni annertuumik ajornartorsiuteqarpugut, IA-p siulittaasua Sara Olsvig isumaqarpoq
IA-p siulittaasuata Sara Olsvigip qinersinerup inernera tulluusimaarutigalugulu nuannaarutigaa.
- Nukittuumik ilaasortaatitaqalerpugut, Folketingimilu Kalaallit Nunaannit partiini suli anginerpaalluta, Sermitsiaq.AG-mut oqarpoq.
IA-mut pisoqarneratut sooq taama pisoqarsimava?
- Qineqqusaarneq unneqqarissumik, tutsuiginartumik tigussaasumillu ingerlassimavarput, tamannalu kinguneqarluarpoq.
Folketingimut qinersinermut atatillugu partiip siulittaasuatut arlaannik uggorisaqarpit?
- Isumaqarpunga politikkikkut oqariartuutivut erseqqissumik saqqummiussimagivut. Partiini siunnersuutinik tigussaanerpaanik saqqummiussaqarpugut. Isumaqarpunga partiit tamarmik Folketingimut qinersinerup innuttaasunut soqutiginarnerusunngortinnissaanik unammilligassaqarsimasut. Tullissaanut aamma taamaaliussaagut. Tamanna qinersinermut peqataanerup amigarneranit aamma takutinneqarpoq.
Folketingimut qinersinerup Kalaallit Nunaanni inerneranut tamarmiusumut qanoq oqaasissaqarpit?
- Tamat oqartussaaqataaneranni annertuumik ajornartorsiuteqarnerput qularutissaanngilaq. Qinersinermut peqataasut 50 procentit inorpaat, malugalugu qinersinermut kalaallit ilaasortanngortitassaasa aalajangiisuusorujussuarmik inissisimaffeqangajassutigisaannut. Partiit tamarmik pissutsit ilungersunartorujussuartut tigusariaqarpaat. Isumaqarpunga innuttaasut politikeriluartorujussuusut. Tamatumalu aaqqiissuteqarfiginissaa tamatta akisussaaffigaarput, Sara Olsvig isumaqarpoq.
Folketingimut qinersinerup naalagaaffeqatigiinneq tamakkerlugu inernera qanoq isumaqarfigaajuk?
- Qallunaat taasipput, tamannalu ataqqisariaqarparput. Kisianni ineriartorneq ernumanartoqartippara, Dansk Folkepartilu naalakkersuisooqataalissappat naalagaaffeqatigiinnermut pingaartumik unammilligassaqarneranik isumaqarlunga. Qallunaat qinersisartut akornanni talerpimmut erseqqissumik sangoriartoqarsimavoq, tamannalu tunngavigalugu Atlantikup avannaaneersut saamerlernik erseqqissunik sisamanik isertitaqarnerat nuannaarutigaara, Sara Olsvig oqarpoq taamaalillunilu Kalaallit Nunaanni qinersineq Siumumit IA-millu ajugaaffigineqartoq Savalimmiunilu qinersineq republikanerinit ajugaaffigineqartoq Socialdemokratinillu tullersortaaffigineqartoq innersuussutigalugit.
Savalimmiuni qinersineq uissuumminartoq uani atuaruk.
Dansk Folkepartip ajornartorsiutaasinnaanera aamma uani atuaruk.
- Partiit saamerliit Danmarkimi qinersinermi ajugaanissaat soorunami takorusunnerusimagaluarparput. Kisianni aallaqqaataaniilli oqarnitsitut, qallunaat ministeriuninngortitassaminnik qinersinissartik namminneq aalajangigassaraat, Sara Olsvig oqarpoq.
Aaja Chemnitz Larsenip Folketingimi sunik suliaqarusunnera aamma atuaruk