sumiginnaaneq
Sara Olsvig piaartumik iliuuseqaqqusivoq
Meeqqanut inuusuttunullu sulianut tunngatillugu kommunit tamarmik annertuumik unammilligassaqarput. Nunatsinni illoqarfiit 18-iusunit 15-t tikillugit Nakkutilliinermut ingerlatsiviup nakkutilliiartorfigereersimasaani aqutsineq pitsaanngitsoq paasineqarpoq. Sumiiffiit ilaanni ernumanarluni.
Tamatuma isumaginninnermut naalakkersuisoq Sara Olsvig, borgmesterit aamma naalakkeruisoqatigini arlallit ataatsimeeqatiginissaat pisariaqalersoq nassueruteqartippaa, taamaalilluni pissutsit ilungersunartut ataatsimut iliuuseqarnikkut aaqqiivigineqarniassammata.
Olsvig: ''Ataatsimut isiginnittariaqarpugut''
Sara Olsvigimit tusagassiuutinut nalunaarut inuit hunnorujulikkaat Nuummi kommunip allaffiata saavani akerliussutsimik takutitsinerisa nalaani nassiunneqarpoq. Akerliussutsimik takutitsisut kommunip saavani naapipput, iniuaqatigiinni meeqqat sanngiinnerpaat tassani kommunip aqutsivieqarfiata atugarititaanut akerliunertik takutippaat.
- Naalakkersuisut isumaqatigiilluta isumaginninnermut suliassaqarfik pingaarnersiorsimavarput. Isumaginninnermut aqutsisoqarfimmik pilersitsivugut meeqqallu tapersersorneqarnissaannut inatsit Inatsisartunit isumaqatigiissunit akuerineqareerluni. Pingaarnersiuinerli tassunga unissanngilaq. Meeqqat ajunnginnerusumik atugaqalernissaannut suliniuteqarnitsinni isumaginninnerup saniatigut suliassaqarfinni allani aamma iliuuseqarnerusariaqarpugut, Sara Olsvig tusagassiuutinut nalunaarummi oqarpoq.
- Angajoqqaat toqqissisimaffigisinnaasaminnik pitsaasunillu suliffissaqassapput, atornerluinernut katsorsartinnissamut periarfissaqassapput, ilinniarnissamut periarfissaqassapput ilaqutariillu atugarliortut toqqissisimanartunik inissaqartinneqassapput. Ataatsimut isiginnittariaqarpugut. Taamaammat qanoq ililluta pitsaanerpaamik piaarnerpaamillu ataatsimoorussamik iliuuseqarnissarput pillugu naalakkersuisoqatikka arlallit pingaarnertullu Naalakkersuisut Siulittaasuat ataatsimeeqatiserissavakka.
- Borgmesterit borgmesterinngortussallu nutaat sulillutik aallartissimalerput. Taamaammat Naalakkersuisut isumaginninnermut aqutsisoqarfik aqqutigalugu kommuninut assatsinnik isaassinitsinnik kinguneqarluartumik tigusilluarnissaat suliassanullu tapersiilluarnissaat pillugu tamakkerlugit aasartinnagu ataatsimeeqatiserissavakka. Ataatsimoorluta suliassat kivinnissaannut kommunit ilisimasaminnik avitseqatigisariaqarpaatigut pingaarnertullu suliassamut ilaalluartariaqarlutik. Meeqqat ilaqutariillu atugarliortut salliutillutigit politikkikkut ataatsimoortariaqarpugut, Sara Olsvig oqarpoq.
Nakkutilliinermik ingerlatsivik illoqarfinnut pingasunut tikeraassaaq
Nakkutilliinermik ingerlatsiviup illoqarfiit pingasut suli nakkutilliivigineqarsimanngitsut tikeraassavai. Taakku tassaaapput Qaanaaq, Upernavik aamma Uummannaq.