Sara Olsvig nunat avannarlerni nersornaammik tunineqarpoq
Sara Olsvig "Inclusion Award 2023"-imik nersornaaserneqassaaq. Nunat avannarliit DE&I pillugu ataatsimeersuarnermi Womenomicsip nersornaasiinera "The power of diversity and inclusion in times of turbulence"-imut tunngavoq.
ICC-p siulittaasua, Sara Olsvig, nunat avannarlerni DE&I pillugu ataatsimeersuarnermi, Womenomicsip nersornaasiuttagaanik ukioq manna tunineqassaaq. Nersornaasiinerit 2. maj pissapput.
Nersornaasiinermi sammisaq tassaavoq "The power of diversity and inclusion in times of turbulence" (Piffissami ilungersunartorsiorfiusumi assigiinngisitaartuunerup peqataatitsinerullu pissaanera).
ICC-p siulittaasua nersornaammik The Womenomics Inclusion Award 2023-imik tunineqassaaq politikkikkut suliaqarsimanera pillugu kiisalu nunat inoqqaafisa pisinnaatitaaffii pillugit nunat tamalaat akornanni oqaaseqartarnera pillugu. Womenomics tusagassiorfinnut taama nalunaaruteqarpoq.
- Sara Olsvig ersarilluinnartumik oqariartuuteqartarnermini silap pissusiata allanngoriartornera pillugu, assigiinngisitaartuuneq aamma inuit pisinnaatitaaffii pillugit saqqumilaartuusimavoq. Saqqumilaarnermini Issittumi nunat tamalaat suleqatigisinnaavai, sumiiffiup illersorneqarnerpaaffissamik pisariaqartitsinera pillugu suliaqartarluni, Womenomics allappoq.
Ataqqinaatitut tigugaa
Womenomics ilanngullugu allappoq nunat inoqqaavi nunarsuarmi peqataatinneqarnerunissaat pillugu Sara Olsvig ICC-p siulittaasuatut ersarilluinnartumik suliaqarsimasoq.
- Womenomicsip Inclusion Awardsianik nersornaaserneqarnissara ataqqinaatitut tiguara. Nunarsuarmi naligiinnginnerujussuup assoroornarnerujussuullu nalaani issittumi arnat allannguinissamut siuttuupput, siunissaq naligiissitsinerusoq naapertuilluarnerusorlu anguniarlugu, Sara Olsvig oqarpoq nangillunilu:
- Siuaasatsinnit nukissaq uagutsinnut tunniunneqarsimasoq, ukioqatigiiaat uagut ataatsimoorluta arnat niviarsiaqqallu pisinnaatitaaffii naammattumik pitsaasumillu ingerlanissaat qulakkiissavarput, Sara Olsvig oqarpoq.
Nersornaaserneqartut allat marluk
Namminersortoq Frederikke Antoine Schmidt arnat kamiinik niuertarfimmik Roccamoremik ingerlataqarnermini pitsaasumik allanngueqataasimanera pillugu Entrepreneurship Awardimik nersornaaserneqassaaq.
Global Impact Award Julia Hoggetimut, niuertut aningaasarsiuteqartullu allat niueqatigiittarfianni London Stock Exchangemi pisortamut tunniunneqassaaq. Taassuma tuluit aningaasaataasa niueqatigiittarfimmi ingerlalluaannarnissaanik suliniuteqarsimanini nersornaasissutigissavaa.
Womenomics Awardsinnattussat toqqarneqartarput, innersuunneqartunilu toqqarneqartut tassaasarput arnat pingasut maligassiuisut.
Kunngissap nulia Mary, Stine Bosse, danskit politikeriat Connie Hedegaar aamma TV-mi saqqummertartoq Sofie Linde aamma Womenomicsimit nersornaasigaanikuupput.