Sara Olsvig nunani tamalaani ICC-mi siulittaasunngorpoq
Sapaatip-akunnerani matumani ICC-p ataatsimeersuarnerani Inuit Ataqatigiit siulittaasorisimasaat Sara Olsvig ICC-mi siulittaasutut qinerneqarpoq.
ICC nalunaarummik nutaamik 2026-ip tungaanut atuuttussamik ataatsimeersuarnerit 14-issaanni akuersissuteqarpoq, tamanna ulluni 19.-21. juli internetikkut aallartitanit 66-init peqataaffigineqartumi pivoq, qulequtaralugu “Inuit – Pertujaassuseq Eqqisseqatigiinnerlu”.
Naalakkersuisut siulittaasuat, Múte Bourup Egede, ataatsimeersuarnermi illersuisuuvoq.
ICC-p Sara Olsvig siulittaasutut toqqarpaa, Dalee Sambo Dorough Alaskameersoq kingoraarlugu.
- ICC 1977-imi pilersinneqarmalli Siunnersuisoqatigiiffiup Inuit Nunaanni nunagisatta eqqissinermuinnaq atorneqassasut aamma naalagaaffiit attuumaffigisatta tamat oqartussaaqataanerat namminerlu aalajangiisinnaassuseqarnitsinnik pisinnaatitaaffeqarnerput ataqqillugit suleqatigissagaatigut, Sara Olsvig siulittaasutut qinigaanermi kingorna oqarpoq.
Marsimi IA-mi politikeriusimasup allap ICC Kalaallit Nunaanni siulittaasunngorfigaa, tassa Kuupik Kleistip Hjalmar Dahl kingoraarmagu.
Aqutsisoq misilittagartooq
Sara Olsvigip anersaaq atorneqartoq nangillugu sulineq ingerlaqqissasoq oqarpoq.
- Issittoq angerlarsimaffigigatsigu nalunngeqaarput – aamma nalunngilarput Inuit Nunaat tassaasoq akornatsinni suleqatigiiffiulluni, oqaloqatigiittarfiulluni isummanillu paaseqatigiiffiulluni aalajangigassanik inerniliisarfiusoq. Anersaaq tamannarpiaq toqqammavigalugu Inuit Issittormiut Siunnersuisoqatigiiffiat pilersinneqarpoq, tamannarpiarlu toqqammavigalugu sulinerput ingerlateqqissavarput.
Sara Olsvig Inuiaqatigiilerinermit, Aningaasaqarnermi & Tusagassiornermi Issittumi Inuiaqatigiilerinermik Ilisimatusarfimmi & Nasiffimmi Aningaasaqarnermut Nunanut Allanut Isumannaallisaanermilu politikkimut immikkoortortaqarfimmi ph.d.-tut ilisimatusartuuvoq.
Siornatigut IA-mi siulittaasuunikuuvoq, inuit pisinnaatitaaffiinut siunnersuisoqatigiinni siulittaasuusimalluni aamma Inatsisartunut Folketingimullu ilaasortaanikuulluni.
Nunanit tamalaanit siulersuisut
- Siulittaasoq: Sara Olsvig, Kalaallit Nunaat
- Alaska: Siulittaasup tullia: Marie Greene aamma ilaasortaq: Nicole Kanayurak Wojciechowski
- Canada: Siulittaasup tullia: Lisa Koperqualuk aamma ilaasortaq: Herb Nakimayak
- Kalaallit Nunaat: Næstformand: Kupik V. Kleist aamma ilaasortaq: Nuka Kleemann
- Tjukotka: Siulittaasup tullia: Irina Mishina aamma ilaasortaq: Zinaida Chernousova
Sara Olsvig ukiuni sisamani 2026-ip tungaanut siulittaasussatut qinerneqarpoq. Aappaagu Ilulissani ataatsimeersuartoqarnissaa isumaqatigiissutigineqarpoq, ataatsimeersuarnerit 14-iat internetikkut ingerlanneqarmat. Tamatuma peqatigisaanik ICC-p ataatsimeersuarnerisa 15-iat Canadami 2026-mi ingerlanneqassasoq aalajangerneqarpoq.
Ataatsimeersuarnermi aallartitat ilaatigut makku tusarfigaat:
Siunissami nunat tamalaat suleqatigineqarnissaat; Nunat tamalaanni Nunap Inoqqaavisa Pisinnaatitaaffii nunallu tamalaat akornanni suleqatigiinneq; Inuussutissaqarniarneq; Ilaqutariit Inuusuttullu; Peqqinnissaq inuunerissuunerlu; Ilinniartitaaneq Oqaatsillu aammalu Nunap Inoqqaavisa Ilisimasaasa atorneqarnissaannut tunngasut.