Sara Olsvig Naalakkersuisunut: Sakkutuulersorneq annertusarneqassappat piumasaqaateqartoqartariaqarpoq

Amerikamiut illersornissamut Kalaallit Nunatsinni aningaasalersuiniarneranut nunarput silatusaarluinnarluni ingerlatsisariaqarpoq, IA-p siulittaasua Sara Olsvig oqarpoq

Suli maannamut nalunarpoq, amerikamiut Kalaallit Nunatsinni mittarfissualiornissanut pilersaarummut aningaasalersueqataaniarnerat qanoq iliorlutik aammalu qanoq annertutigisumik amerikamiut aningaasaleeqataaniarnersut, taamaattorli IA naapertorlugu paatsuugassaanngitsoq tassaavoq, amerikamiut kissaatigigaat Kalaallit Nunatta nunataani sakkutooqarnerminik annertusaaniartoq, tamannalu IA-p siulittaasuata Sara Olsvig-ip mianersoqqussutigaa:

– Uanga qularinngilluinnarpara, amerikamiut allakkunik Kalaallit Nunaanni mittarfissuit aqqutigalugit USA-p NATO-llu atlantikup avannaani annertusaanissamik pisariaqartitsisut, taava tamanna isumaqarpoq sakkutooqarnikkut annertusaaniartoqartoq. Annertusaanerlu tamanna Kalaallit Nunatta nunataani pissasoq qularutissaanngilaq.

- Ikinngutit. Qarasarput qamillugu isiginnaaginnassanngilagut. Uummateqarlutalu qarasaqarpugut. Ataqqinassuseqarpugut pingaartitaqarlutalu, nunattalu sorsuffinngortinneqannginnissaanik piumasaqarnissamut pisinnaatitaaffeqarpugut. Mittarfissuarnik kuultitalersukkanik piviusunngortitsiniaannarluta tarnitta nalunngeqatiginnissusaa akigissanngilarput.

Pisariaqatitat oqimaalutarlugit

- Illersornissamik uagut pisariaqartitavut Amerikamiut nunatsinniinnerannut oqimaalutassavavut, nunarsuatsinnimi nunarsuullu immikkoortuani najugaqarfitsinni, ajoraluartumik maanna suli sakkutooqarnikkut annertusaavigineqartumi, isumannaatsumik inuunissaq pisariaqartipparput. Sakkutuulersornerulli annertusarneranut aqqutissiueqataassanngilagut.

Sara Olsvigip mianersoqqusinini Sermitsiamut itisilerpaa, nunarsuaq tamakkerlugu maanna sakkutooqarnikkut annertusaaneq ingerlanneqartoq arajutsisassaannginnerarlugu, matumanilu tikkuarlugit tuluit, russit aammalu amerikamiut sakkutooqarnikkut nunarsuarmi, minnerunngitsumillu aamma issittumi annertusaanerat.

Allaaserisaq tamaat Sermitsiami atuaruk. Uani ataani linki aqqutigalugu aviisimut isissutissarsigit:

Powered by Labrador CMS