Sara Olsvig Kalallit Nunaanni Inuit pisinnaatitaaffii pillugit Siunnersuisoqatigiinni siulittaasunngorpoq
Anders Meilvang siulittaasup tulliatut qinerneqarpoq. Siulittaasoq siulittaasullu tullia tamanit qinerneqarput.
Kalaallit Nunaanni Inuit pisinnaatitaaffii pillugit Siunnersuisoqatigiit nutaat tallimanngornermi novemberip 29-ani ivertinneqarput. Sara Olsvig siunnersuisoqatigiinni siulittaasunngorpoq, Anders Meilvangilu siulittaasup tullinngorluni.
Siunnersuisoqatigiit 13-inik ilaasortaqarpoq. Qulit Inatsisartunit toqqarneqarput, kiisalu meeqqat illersuisuat, inuit innarluutillit illersuisuat naligiissitaanermilu siunnersuisoqatigiit siulittaasuat, siunnersuisoqatigiinni ataavartumik ilaasortaatinneqarlutik.
Siunnersuisoqatigiit ukuulerput:
- Sara Olsvig, siulittaasoq
- Anders Meilvang siulittaasup tullia
- Nike Berthelsen, Landsforeningen Autisme Kalaallit Nunaat
- Lise Mørup Dalgaard, Nunatsinni Advokatit
- Annemette Nyborg Lauridsen, Ilisimatusarfik
- Sofie Lennert, Kattuffik Utoqqaat Nipaat
- Henrik Sandgreen, KNAPK
- Hans Reimer, KNIPK
- Ludvig Larsen, SIK
- Aviâja Egede Lynge, Meeqqat Illersuisuat
- Christina Johnsen, Inuit Innarluutillit Illersuisuat
- Kathrine Bødker, Naligiissitaanissamut Siunnersuisoqatigiit siulittaasuat
Inatsip nutaap attuumassuteqartikkunnaarpaa
Inatsit nutaaq januaarip aallaqqaataani 2019-imi atulersoq malillugu, siunnersuisoqatigiit Naalakkersuisut ataanni inissisimajunnaarpoq, taamatullu ilaasortat naalakkersuisunit toqqarneqartarunnaarlutik. Maanna toqqaanermi siullermeertumik Inatsisartut toqqaapput, inuiaqatigiinnit innersuussutigineqartut malillugit.
Allattoqarfik Namminersorlutik Oqartussani naalakkersuisoqarfiit ilaanniikkunnaarluni, nammineerluni allami inissippoq.
- Inatsisip nutaap pingaarutilittut qulakkeerpaa Kalaallit Nunaanni Inuit Pisinnaatitaaffii pillugit Siunnersuisoqatigiit pituttorsimannginnerullutik inissinnerat. Uagullu siunnersuisoqatigiinni ivertinneqartugut, nukittuumik aalaakkaasumillu allattoqarfeqalernissarput qulakkeerniartussanngorparput, taamaalilluta siunnersuisoqatigiit inuiaqatigiinni inuit pisinnaatitaaffiinut tunngasuni peqataanerulerniassammmata. Siunnersuisoqatigiit attaviinnerulernerisa Kalaallit Nunaanni
inuit pisinnaatitaaffii pillugit allaffeqarfittaarnissaq instituttitaarnissarluunniit qaninnerulersippaa, Sara Olsvig tusagassiutinut nalunaarummi oqarpoq.
- Ukiuni aggersuni anguniagarissavarput annertusisamik ilusilersorluagaanerusumillu Kalaallit Nunaanni
ingerlatsiviit siunnersuisooqatigiillu inuit pisinnaatitaaffiinut attuumassuteqartunik suleqateqarnerunissarput, soorlu Meeqqat Illersusoqarfiat Inuillu Innarluutillit Illersuisoqarfiat, Kalaallit
Nunatsinni inuit pisinnaatitaaffiinik suliniuteqarnerput nukittunerpaanngortikkusullu, allassimavoq.
Suliassaqarluarpoq
Kalaallit Nunaannit Inuit pisinnaatitaaffii pillugit Siunnersuisoqatigiit ukiumi nutaami ataatsimeeqatigeeqqaassapput, tassanilu ukiuni tullerni sammisassat suussanersut aalajangerneqassalluni.
- Qularutissaanngitsumik suliassarpassuaqarpugut. Nalunngisatsitut kalaallit meerartaat inuttut pisinnaatitaaffimminnik ilisimasakippallaarput kiisalu inuit pisinnaatitaaffiinik sakkussat pingaarutillit soorlu FN-ip isumaqatigiissutai Kalaallit Nunaannut atuuttut, innarluutillit pillugit isumaqatgiissut Kiisalu Nunat inoqqaavisa pisinnaatitaaffii pillugit Naalagaaffiit Peqatigiit nalunaarutaat ukkatarineqarnerunissaat nakkutigineqarnerulernissaallu sulissutigissavarput, malinneqarnerulernissaat qulakkeerniarlugu. Siunnersuisoqatigiit ivertinneqartugut pingaarutilinnik suliassarpassuaqarpugut. Attaviinnerusumik inissisimaneq nutaaq inuiaqatigiinni suliniuteqarnerunissamik ersarinnerunissamillu akisussaaffimmik nutaamik malitseqarpoq, Sara Olsvig oqarpoq.